இலங்கைக்கு எதிரான பயிற்சி கிரிக்கெட்: 334 ரன்களை 'சேசிங்' செய்து இந்திய அணி அபார வெற்றி

பர்மிங்காம், ஜுன் 2-

இலங்கைக்கு எதிரான பயிற்சி கிரிக்கெட்டில் 334 ரன்கள் இலக்கை இந்திய அணி வெற்றிகரமாக துரத்திபிடித்தது. கோலி, தினேஷ் கார்த்திக் சதம் அடித்து அசத்தினர்.

'மினி உலக கோப்பை' என்று அழைக்கப்படும் சாம்பியன்ஸ் கோப்பை கிரிக்கெட் போட்டி வருகிற 6-ந்தேதி முதல் 23-ந்தேதி வரை இங்கிலாந்தில் நடைபெற இருக்கிறது. டாப்-8 அணிகள் மட்டுமே பங்கேற்கும் இந்த போட்டியில் இந்திய அணி தொடக்க ஆட்டத்தில் பலம் வாய்ந்த தென்ஆப்பிரிக்காவை எதிர்கொள்கிறது.

சாம்பியன்ஸ் கோப்பைக்கு முன்பாக இந்திய அணி இரண்டு பயிற்சி ஆட்டத்திலும் விளையாடுகிறது. இதில் முதல் பயிற்சி ஆட்டத்தில் இந்திய அணி, இலங்கையை பர்மிங்காம் நகரில் நேற்று சந்தித்தது. பயிற்சி ஆட்டத்தை பொறுத்தவரை இரண்டு அணியும் தலா 15 வீரர்களை பயன்படுத்திக் கொள்ளலாம். அதாவது களத்தில் 11 பேர் நின்றாலும், அவர்களை அடிக்கடி மாற்றிக் கொள்ளலாம். பேட்டிங்கின் போது, பீல்டிங்குக்கு வராத வீரர்களையும் களம் இறக்க முடியும்.

டாஸ் ஜெயித்த இந்திய கேப்டன் டோனி முதலில் இலங்கையை பேட் செய்ய அழைத்தார். 22 வயதான குசால் பெரேராவும், 36 வயதான தில்ஷனும் இலங்கை அணியின் இன்னிங்சை தொடங்கினர். இந்த ஜோடி இலங்கை அணிக்கு வலுவான அஸ்திரவாரம் அமைத்து கொடுத்தது.

இர்பான் பதானின் ஒரே ஓவரில் தில்ஷன் 3 பவுண்டரிகள் விளாச, இஷாந்த் ஷர்மாவின் பந்து வீச்சில் குசால் பெரேரா 2 சிக்சர்களை பறக்க விட்டார். இப்படி தொடக்கத்தில் இருந்தே பந்தை நாலாபுறமும் ஓட விட்டு அதிரடி காட்டிய இந்த ஜோடியை பிரிக்க இந்திய கேப்டன் டோனி 7 பவுலர்களை பயன்படுத்தியும் ஒன்றும் செய்ய முடியவில்லை.

தில்ஷன் 68 ரன்களில் இருந்த போது, அஸ்வின் பந்து வீச்சில் இறங்கி வந்து அடிக்க முயற்சித்த போது பந்து ஏமாற்றியது. ஆனால் விக்கெட் கீப்பர் டோனி மிக எளிதான ஸ்டம்பிங் வாய்ப்பை நழுவ விட்டார். இறுதியில் இவர்கள் இருவரும் பின்வரிசை வீரர்களுக்கு வாய்ப்பு அளிக்கும் வகையில் 'ரிட்டயர்ட் ஹர்ட்' ஆகி வெளியேறினர்.

26 ஓவர்களில் 160 ரன்களை எட்டிய போது, குசால் பெரேரா 82 ரன்னிலும் (94 பந்து, 7 பவுண்டரி, 3 சிக்சர்), தில்ஷன் 84 ரன்னிலும் (78 பந்து, 9 பவுண்டரி, ஒரு சிக்சர்) வெளியேறினர்.

அணியின் ரன்ரேட் விகிதம் 6 ரன்களுக்கு குறையாமல் சென்று கொண்டிருந்தது. அடுத்து வந்த பேட்ஸ் மேன்களும் அதை சரியாமல் பார்த்துக் கொண்டனர். முன்னாள் கேப்டன்கள் மஹேலா ஜெயவர்த்தனே 30 ரன்களும், சங்கக்கரா 45 ரன்களும் (32 பந்து, 7 பவுண்டரி), துணை கேப்டன் சன்டிமால் 46 ரன்களும் (48 பந்து) விளாசினர்.

நிர்ணயிக்கப்பட்ட 50 ஓவர்கள் முடிவில் இலங்கை அணி 3 விக்கெட் இழப்புக்கு 333 ரன்கள் குவித்தது. இந்திய தரப்பில் புவனேஷ்வர்குமார், இஷாந்த் ஷர்மா, அமித் மிஸ்ரா ஆகியோர் தலா ஒரு விக்கெட் எடுத்தனர்.

இங்கிலாந்து ஆடுகளங்கள் வேகப்பந்து வீச்சுக்கு சாதகமானவை என்றாலும், நமது வேகப்பந்து வீச்சாளர்கள் ரன்களை வாரி வழங்கினார்களே தவிர, எந்த தாக்கத்தையும் ஏற்படுத்தவில்லை.

பின்னர் 334 ரன்கள் எடுத்தால் வெற்றி என்ற கடின இலக்கை நோக்கி ஆடிய இந்தியாவுக்கு தொடக்கம் மோசமாக இருந்தது. ஷிகர் தவான் ஒரு ரன்னில் ரன்-அவுட் ஆனார். முரளிவிஜய் (18 ரன்), ரோகித் ஷர்மா (5 ரன்), சுரேஷ் ரெய்னா (34 ரன், 31 பந்து, 4 பவுண்டரி) ஆகியோரும் நீண்ட நேரம் தாக்குப்பிடிக்கவில்லை.

110 ரன்னுக்குள் 4 விக்கெட்டுகளை (20.3 ஓவர்) இழந்ததால் இந்திய அணியை குறைந்த ரன்னுக்குள் சுருட்டி விடலாம் என்று இலங்கை வீரர்கள் கணக்கு போட்டனர். ஆனால் 5-வது விக்கெட்டுக்கு கைகோர்த்த விராட் கோலியும், தினேஷ் கார்த்திக்கும் நிலைமையை தலைகீழாக மாற்றினர். அவசரமின்றி ஏதுவான பந்துளை மட்டும் எல்லைக்கோட்டுக்கு விரட்டியடித்த இந்த ஜோடி ஸ்கோரை படிப்படியாக உயர்த்தியது.

அணிக்கு நம்பிக்கையூட்டிய இந்த கூட்டணியை உடைக்க 9 பந்து வீச்சாளர்களை இலங்கை பயன்படுத்தி பார்த்தும் அவ்வளவு சீக்கிரத்தில் அசைக்க முடியவில்லை. கலக்கலாக ஆடிய விராட் கோலி சதம் அடித்தார். சதத்திற்கு பிறகு மேலும் துரிதம் காட்டிய அவர் 144 ரன்களில் (120 பந்து, 11 பவுண்டரி, 3 சிக்சர்) கேட்ச் ஆனார். கோலி-தினேஷ் கார்த்திக் ஜோடி 5-வது விக்கெட்டுக்கு 186 ரன்கள் சேகரித்தது.

இதைத் தொடர்ந்து கேப்டன் டோனி களம் இறங்கினார். மறுமுனையில் நிலைத்து நின்று ஆடிய தினேஷ் கார்த்திக்கும் சதத்தை தொட்டார். அத்துடன் வெற்றிக்கான ரன்னை அவர் பவுண்டரி அடித்து கொண்டு வந்தார். முடிவில் இந்திய அணி 49 ஓவர்களில் 5 விக்கெட்டுக்கு 337 ரன்கள் குவித்து 5 விக்கெட் வித்தியாசத்தில் அபார வெற்றி பெற்றது.

தமிழகத்தை சேர்ந்த தினேஷ் கார்த்திக் 106 ரன்களுடனும் (81 பந்து, 12 பவுண்டரி, 2 சிக்சர்), டோனி 18 ரன்களுடனும் (17 பந்து, 2 பவுண்டரி) களத்தில் இருந்தனர். தினேஷ் கார்த்திக்குக்கு நேற்று 28-வது பிறந்த நாளாகும். பிறந்த நாளில் செஞ்சுரி கண்டதால், இரட்டிப்பு மகிழ்ச்சியில் திளைத்தார்.

இந்திய அணி தனது 2-வது பயிற்சி ஆட்டத்தில் வருகிற 4-ந்தேதி ஆஸ்திரேலியாவை எதிர்கொள்கிறது.

வாழ்த்துக்கள் இந்திய அணிக்கு