நடுக்கடலில் தத்தளித்த புதுக்கோட்டை மீனவர்கள் 5 பேர் மீட்பு

by *சம்ஸ் Sun 7 Apr 2013 - 8:49

புதுக்கோட்டை, ஏப். 7-

புதுக்கோட்டை மாவட்டம் ஜெகதாப்பட்டினம் அருகே உள்ள செல்லனேந்தலில் இருந்து நேற்று முன்தினம் 100-க்கும் மேற்பட்ட என்ஜின் பொருத்தப்பட்ட நாட்டுப் படகின் மூலம் மீனவர்கள் கடலுக்கு மீன் பிடிக்க சென்றனர்.

இதில் அப்பகுதியை சேர்ந்த வினோத் (வயது 22), ரஞ்சித் (21), இளையராஜா(26), சரத் (22), அறிவழகன்(20) ஆகிய 5 பேரும் ஒரு படகில் மீன் பிடிக்க கடலுக்கு சென்றிருந்தனர். இவர்கள் சுமார் 5 நாட்டிக்கல் கடல் மைல் தொலைவில் மீன் பிடித்துக் கொண்டிருந்தபோது திடீரென படகின் என்ஜின் பழுதடைந்தது.

இதனால் தொடர்ந்து கடலில் படகை செலுத்த முடியாமலும், கரைக்கு திரும்ப முடியாமலும் மீனவர்கள் தத்தளித்தனர். உடனடியாக அவர்கள் வைத்திருந்த செல்போன் மூலம், கடலோர காவல் படையின் அவசர உதவி எண் 1093-ஐ தொடர்பு கொண்டு, அவர்களிடம் தங்கள் நிலை பற்றி கூறியுள்ளனர்.

இதையடுத்து திருப்புனவாசல் கடலோர காவல் உதவி ஆய்வாளர் ரகுபதி, மணமேல்குடி கடலோரக் காவல் ஆய்வாளர் கிருஷ்ணராஜ், படகு தொழில்நுட்ப உதவி ஆய்வாளர் செல்லபாண்டி ஆகியோர் கடலோரக் காவல் படைக்கு சொந்தமான அதிவிரைவு படகில் கடலில் விரைந்து சென்ற னர். சிறிது நேர தேடலுக்கு பின்னர், பழுதாகி நின்ற படகை கடலோர காவல்படையினர் கண்டுபிடித்தனர்.

இதையடுத்து அப்பகுதிக்கு விரைந்து சென்று அந்த படகில் இருந்த 5 மீனவர்களையும் மீட்டனர். அந்த படகையும் கயிறு மூலம் தங்கள் படகில் இணைத்து கட்டி, பத்திரமாக கரைக்கு கொண்டு வந்து சேர்த்தனர்.
மாலைமலர்