மணமேல்குடி அருகே நடுக்கடலில் தவித்த 3 மீனவர்கள் மீட்பு

by *சம்ஸ் Wed 19 Jun 2013 - 7:51

புதுக்கோட்டை,ஜூன்.19-

புதுக்கோட்டை மாவட்டம் கோட்டைப்பட்டினத்தைச் சேர்ந்த மீனவர்கள் 246 விசைப்படகுகளில் கடந்த 15ம் தேதி கடலுக்கு மீன் பிடிக்கச் சென்றனர். இவர்களுடன், இதே பகுதியைச் சேர்ந்த சிவா (50), போஸ் (52), நைனாமுகமது (55) ஆகியோர் பட்டுக்கோட்டையைச் சேர்ந்த கண்ணன் என்பவருக்குச் சொந்தமான விசைப் படகில் மீன்பிடிக்கச் சென்றனர்.

மீன் பிடிக்க கடலுக்குச் சென்ற மற்ற மீனவர்கள் அனைவரும் 16ம் தேதி இரவு கரை திரும்பினர். ஆனால் சிவா, போஸ் மற்றும் நைனாமுகமது ஆகியோர் சென்ற படகு மட்டும் வரவில்லை. கரையில் எதிர்பார்த்து காத்திருந்த உறவினர்கள் அவர்களைக் காணாமல் அதிர்ச்சியடைந்தனர்.

இதுகுறித்து திருப்புனவாசல் கடலோர பாதுகாப்பு படைக்கு புகார் தெரிவிக்கப்பட்டது. கடலோர காவல் படையினருடன், மீனவர்களும் விசைப்படகுகளில் கடலுக்கு சென்று தேடும் பணியில் ஈடுபட்டனர்.

அப்போது நடுக்கடலில் என்ஜின் பழுதாகி தவித்த 3 மீனவர்களை நேற்று முன்தினம் மாலை மீட்டனர். இரவு 10 மணிக்கு அவர்களை கரைக்கு கொண்டுவந்து சேர்ந்தனர்.

இதையடுத்து குடும்பத்தினர், உறவினர்கள் மகிழ்ச்சி அடைந்தனர். இதுகுறித்து உயிர் தப்பிய மீனவர்கள் கூறுகையில், நடுக்கடலில் மீன்பிடித்தபோது என்ஜின் பழுதானது. சக மீனவர்கள் எங்களை கவனிக்காமல் வந்துவிட்டனர். செல்போனும் சுவிட்ச் ஆப் ஆகியிருந்ததால் தகவல் கொடுக்க முடியவில்லை. காற்று வீசுவதால் மீனவர்கள் யாரும் கடலுக்கு வரவில்லை. இதனால் 2 நாளாக நடுக்கடலில் தவித்தோம். கண்ணன் உள்ளிட்ட மீனவர்கள் எங்களை மீட்டுவந்தனர்’ என்றனர்.