விருதுநகரில் ஸ்டவ் வெடித்து வீடு தீப்பிடித்தது: பெண் பலி

விருதுநகர், ஏப். 24-

விருதுநகரில் சாமியார் கிணற்று தெருவில் தனியார் பள்ளிக்கூடத்துக்கு சொந்தமான குடியிருப்பு பகுதி உள்ளது. இங்கு ஏராளமான குடிசை வீடுகள் உள்ளன. இந்த பகுதியில் வசித்து வந்தவர் பட்டம்மாள் (வயது73). இவர் நேற்று இரவு வீட்டில் ஸ்டவ் அடுப்பில் குழம்பு சூடுபடுத்தினார். பின்னர் அவர் தூங்கிவிட்டார்.

நள்ளிரவு ஸ்டவ் அடுப்பு `டமார்' என்று வெடித்து வீட்டில் தீப்பிடித்தது. இதில் வீட்டில் தூங்கி கொண்டு இருந்த பட்டம்மாள் உடல் கருகி பலியானார். பட்டம்மாள் வீட்டில் பிடித்த தீ அருகில் இருந்த வீடுகளுக்கும் பரவியது. வீடுகளில் தூங்கி கொண்டு இருந்த பொதுமக்கள் அலறியடித்து வெளியில் ஓடிவந்தனர்.

இதுபற்றி தகவல் அறிந்ததும் விருதுநகரில் இருந்து தீயணைப்புப்படையினர் விரைந்து சென்று தீ மேலும் பரவவிடாமல் தடுத்தனர். இருப்பினும் 7 வீடுகள் எரிந்து நாசமானது. இந்த தீ விபத்து பற்றி தகவல் அறிந்ததும் கலெக்டர் ஹரிகரன், மாவட்ட வருவாய் அதிகாரி ராஜு ஆகியோர் சம்பவ இடம் விரைந்து சென்று பார்வையிட்டனர்.

தீ விபத்தில் வீடுகளை இழந்தவர்கள் அருகில் உள்ள திருமண மண்டபத்தில் தங்க வைக்கப்பட்டனர். அவர்களுக்கு நிவாரண உதவி வழங்க கலெக்டர் உத்தரவிட்டார். இந்த தீ விபத்தில் ரூ.2 லட்சம் மதிப்புள்ள பொருட்கள் எரிந்து நாசமானது. விருதுநகர் மேற்கு போலீசார் வழக்குப்பதிவு செய்து விசாரணை நடத்தி வருகிறார்கள்.

மாலைமலர்

:+

குடிசையில் வாழ்ந்த மக்களுக்கு இப்போது அதும் இல்லாத நிலை மிகவும் வருத்தமாக உள்ளது `#