கதிரியக்கத்தினால் பாதிக்கப்பட்ட ஜப்பானியர்கள் நஷ்டஈடு கேட்டு போராட்டம்

டோக்கியோ, மே 22-

கடந்த 2011ஆம் ஆண்டு, சுனாமி தாக்கியதால், ஜப்பானின் புகுஷிமா அணுஉலை பெரிய அளவில் சேதமடைந்தது. அதனைச் சுற்றி வாழ்ந்து வந்த மக்கள் தங்கள் இருப்பிடங்களை விட்டு வெளியேற நேரிட்டது. இவர்களுக்கான நஷ்ட ஈட்டுத் தொகையை அரசு வழங்கிக்கொண்டிருக்கின்றது.

புகுஷிமாவில் இருந்து 50 கிமீ தொலைவில் உள்ள மியாகி எல்லைக்குள் வரும் ஹிப்போ மாவட்டத்தில் வாழ்ந்து வரும் மக்களும், நஷ்ட ஈடு கேட்டு நேற்று மனு தாக்கல் செய்துள்ளனர். தங்களுடைய பகுதியும் கதிரியக்கத்தால் அதிகம் பாதிக்கப்பட்டுள்ளதாகவும், மருத்தவ பரிசோதனைகள், கதிரியக்க அளவுகளைக் கண்காணித்தல், சுத்தம் செய்தல் போன்ற பல செலவினங்கள் தங்களுக்கு இருப்பதால் புகுஷிமாவில் அளிக்கப்பட நஷ்டஈடு தங்களுக்கும் வழங்கப்பட வேண்டும் என்று அவர்கள் கோரிக்கை விடுத்துள்ளனர்.

குழந்தைகளுக்கும், கர்ப்பிணிப் பெண்களுக்கும் 7,000 டாலரும், ஆண்களுக்கு 1,180 டாலரும் வழங்கப்பட வேண்டும் என்பது அவர்களின் கோரிக்கையாக இருந்தது.

பல மாதங்கள் நடத்திய பேச்சு வார்த்தைக்குப் பின், அணு உலையை நிர்வகிக்கும் டோக்கியோ மின்சக்தி நிறுவனம், இந்தத் தொகையில் பாதி அளவு அவர்களுக்குத் தருவதாக ஒப்புக்கொண்டுள்ளது.

அணுஉலையை சுத்தம் செய்வதற்கும், புகுஷிமாவிலிருந்து வெளியேறிய மக்களுக்கு நஷ்ட ஈடு வழங்கும் செலவுகளும் அதிகமானதால் டோக்கியோ மின்சக்தி நிறுவனம் திவாலானதாக அறிவித்துள்ளது. அரசின் மேற்பார்வையின் கீழ் இயங்கும் இந்நிறுவனம் அளிக்கும் தொகை முழுவதும் ஜப்பானிய அரசால் அளிக்கப்படுகின்றது.

இதுவரை, 22.5 பில்லியன் டாலர் இதுபோல் நஷ்டஈடாக அளிக்கப்பட்டுள்ளது. திட்டமிட்ட 29 பில்லியனை விட செலவினங்கள் அதிகரிக்கும் என்பதால் அரசு மேலும் 1.5 பில்லியன் தொகையை நஷ்ட ஈடு நிதியில் சேர்த்துள்ளது.

மேலும், அணு உலை மையங்களும், ஜப்பானிய அரசால் தீவிரமாகக் கண்காணிக்கப்பட்டு வருகின்றன.

கண்டிப்பாக நஷ்டஈடு கொடுத்தே ஆகவேண்டும்