வங்கிக் கொள்ளை: 100 மில்லியன் நஷ்டஈடு கோரும் பிள்ளையான்!

by **இன்பத் அஹ்மத்** Sat 13 Aug 2011 - 9:40

மட்டக்களப்பு புத்தூர் வங்கிக் கொள்ளையில் தமிழ் மக்கள் விடுதலைப்புலிகள் கட்சியினை தொடர்புபடுத்தி செய்தி பிரசுரித்தமைக்காக த ஐலண்ட் பத்திரிகையிடம் 100 மில்லியன் ரூபாய் நஷ்டஈடு வழங்கும்படி அக்கட்சி கோரியுள்ளது.

ரி.எம்.வி.பியின் முக்கிய புள்ளி 175 மில்லியன் ரூபாய் வங்கி கொள்ளைப் பணத்துடன் கைது என்ற தலைப்புடன் கடந்த மாதம் 21 ஆம் திகதி த ஐலண்ட் பத்திரிகையின் முதற் பக்கத்தில் பிரசுரிக்கப்பட்ட செய்தி தொடர்பிலே அக்கட்சி நஷ்டஈடு கோரியுள்ளது.

தமிழ் மக்கள் விடுதலைப் புலிகள் கட்சி குறித்த பத்திரிகைக்கு எதிராக தமது சட்டத்தரணி மூலம் சட்ட நடவடிக்கை மேற்கொண்டுள்ளது என்று கட்சியின் ஊடக இணைப்பாளர் தேவராஜன் தெரிவித்துள்ளார்.

குறித்த செய்தியானது எந்தவொரு அடிப்படை ஆதாரங்கள் அற்ற முறையில், கட்சியையும் கட்சி தலைவரையும் தொடர்புபடுத்தியதனால் கட்சிக்கு அபகீர்த்தியும் அகௌரவமும் ஏற்பட்டுள்ளது.

இதனால் குறித்த செய்தி தொடர்பில் குறித்த பத்திரிக்கை பகிரங்க மன்னிப்பு கோருவதுடன் 100 மில்லியன் ரூபாய் நஷ்டஈடாக செலுத்த வேண்டும் எனவும், 3 வாரங்களுக்குள் குறித்த நடவடிக்கைகள் பத்திரிக்கையினால் மேற்கொள்ளப்படாதவிடத்து, பத்திரிகைக்கு எதிராக அடிப்படை மனித உரிமை மீறலின் கீழ் மானநஷ்ட வழக்குத் தாக்கல் செய்யப்படும் எனவும் எச்சரிக்கப்பட்டுள்ளது.

இது தொடர்பான கோரிக்கைக் கடிதம் கட்சி சார்பாக கட்சியினால் நியமிக்கப்பட்ட சட்டத்தரணியினால் கடந்த 8 ஆம் திகதி அன்று பதிவுத் தபால் மூலம் பத்திரிகை ஆசிரியருக்கு அனுப்பப்பட்டுள்ளதாக ஊடக இணைப்பாளர் தேவராஜன் கூறியுள்ளார்.