போராளிகள் பிடியில் இருந்த குசைர் நகரை சிரியா ராணுவம் கைப்பற்றியது

டமாஸ்கஸ், ஜூன் 6-

சிரியா அதிபர் பஷீர் அல் ஆசாத்தின் ஆட்சிக்கு எதிராக கடந்த 2 ஆண்டுகளாக மக்கள் கடும் போராட்டத்தில் ஈடுபட்டுள்ளனர். அவர்களில் சிலர் ஆயுதமேந்தி ராணுவத்திற்கு எதிராக போரில் இறங்கியுள்ளனர்.

லெபனான் எல்லையோரம் உள்ள சில கிராமங்களையும் முக்கிய நகரங்களையும் போராளிகள் கைப்பற்றி தங்களது கண்காணிப்பில் வைத்துள்ளனர்.

இவற்றில் குசைர் நகரமும் ஒன்றாகும். இந்த நகரத்தின் வழியாகதான் லெபனான் நாட்டில் இருந்து ஆயுதங்களை கடத்தி வந்து ராணுவத்திற்கு எதிராக போராளிகள் தாக்குதல் நடத்துகின்றனர்.

எனவே, போராளிகளின் பிடியில் இருந்து இந்நகரை மீட்க கடந்த மாதம் 19ம் தேதியில் இருந்து போராளிகள் முகாம்கள் மீது ராணுவம் அதிரடி தாக்குதலில் ஈடுபட்டது.

முதல் கட்டமாக குசைர் நகருக்கு செல்லும் வழியில் உள்ள கிராமங்களை கைப்பற்றிய ராணுவம், நேற்றிரவு குசைர் நகரையும் முழுமையாக கைப்பற்றியது.

ராணுவத்தின் அதிரடி தாக்குதலில் பல போராளிகள் கொல்லப்பட்டதாகவும், சிலர் சரணடைந்ததாகவும், மேலும் சிலர் உயிருக்கு பயந்து தப்பியோடி விட்டதாகவும் சிரியா அரசின் தொலைக்காட்சி நேற்று செய்தி வெளியிட்டது.