67-வது சுதந்திர தினம்: ஜெயலலிதா நாளை கொடி ஏற்றுகிறார்

by *சம்ஸ் Wed 14 Aug 2013 - 8:24

சென்னை, ஆக. 14-

67-வது சுதந்திர தின விழா, நாளை நாடு முழுவதும் கோலகலமாக கொண்டாடப்படுகிறது. சென்னையில் தமிழக அரசு சார்பில் சுதந்திர தின விழாவை எழுச்சியுடன் கொண்டாட ஏற்பாடு செய்யப்பட்டுள்ளது. இதையொட்டி சென்னை புனித ஜார்ஜ் கோட்டை மின் விளக்குகளால் அலங்கரிக்கப்பட்டுள்ளது.

நாளை காலை 8.55 மணிக்கு முதல்-அமைச்சர் ஜெயலலிதா கோட்டை கொத்தளத்தின் முன்பு அமைக்கபட்டு உள்ள அணிவகுப்பு மேடைக்கு வருகிறார். அவரை அரசு தலைமைச் செயலாளர் ஷீலா பாலகிருஷ்ணன் வரவேற்கிறார். அதை தொடர்ந்து முப்படை தளபதிகள், உயர் போலீஸ் அதிகாரிகளை முதல்-அமைச்சருக்கு தலைமைச் செயலாளர் அறிமுகம் செய்து வைக்கிறார்.

சரியாக காலை 9 மணிக்கு தேசிய கொடியை முதல்-அமைச்சர் ஜெயலலிதா ஏற்றி வைக்கிறார். பின்னர் சுதந்திர திருநாள் உரையை நிகழ்த்துகிறார். இதில் முக்கிய அறிவிப்புகள் வெளியாகலாம் என்று எதிர்பார்க்கப்படுகிறது. வீர தீர செயல் புரிந்தவர்களுக்கு முதல்-அமைச்சர் ஜெயலலிதா விருதுகள் வழங்கி கவுரவிக்கிறார்.

கோட்டை நுழைவாயிலில் அமைக்கப்பட்டுள்ள பந்தலில் மாற்றுத்திறனுடைய குழந்தைகளுக்கு இனிப்புகளையும் வழங்குகிறார். விழாவில் அமைச்சர்கள், உயர் அதிகாரிகள் சிறப்பு அமைப்பாளர்கள் பங்கேற்கிறார்கள்.

பொது மக்களும் நிகழ்ச்சிகளை பார்க்கலாம். இதையொட்டி கோட்டை பகுதியில் பலத்த பாதுகாப்பு ஏற்பாடுகள் செய்யப்பட்டுள்ளன. வழக்கமாக சுதந்திர தின விழாவில் பங்கேற்க வரும் முதல்-அமைச்சர் நேராக கோட்டைக்குச் சென்று கொத்தளத்தில் தேசிய கொடியை ஏற்றுவார்கள்.

இந்த ஆண்டு நாளை கொடி ஏற்றுவதற்கு முன்னதாக கடற்கரை சாலையில் உள்ள போர் நினைவுச் சின்னத்தில் முப்படை வீரர்களுக்கு மரியாதை செலுத்தும் நிகழ்ச்சி நடைபெற உள்ளது. இதில் முதல்-அமைச்சர் ஜெயலலிதா பங்கேற்கிறார்.

முப்படை வீரர்களின் தியாகத்தை போற்றும் வகையில் போர் நினைவுச் சின்னத்தில் மலர் வளையம் வைத்து மரியாதை செலுத்துகிறார். அதன் பிறகு கோட்டை சென்று சுதந்திர தின விழா நிகழ்ச்சிகளில் கலந்து கொள்கிறார்.