தமிழ்நாடு முழுவதும் இன்று முதல் 304 பஸ் நிலையங்களில் ‘அம்மா குடிநீர்’ விற்பனை

by *சம்ஸ் Mon 16 Sep 2013 - 9:33

சென்னை, செப். 16–
பொது மக்களுக்கு குறைந்த விலையில் பாதுகாப்பான குடிநீர் வழங்க வேண்டும் என்ற நோக்கத்தில் திருவள்ளூர் மாவட்ட கும்மிடிப்பூண்டியில் உள்ள சாலை போக்குவரத்து வளாகத்தில் ‘அம்மா குடிநீர்’ உற்பத்தி நிலையம் அமைக்கப்பட்டுள்ளது.
முதல்–அமைச்சர் ஜெயலலிதா நேற்று இதனை தொடங்கி வைத்து, 1 லிட்டர் பாட்டில் குடிநீரை 10 ரூபாய்க்கு பணம் கொடுத்து வாங்கி விற்பனையையும் தொடங்கி வைத்தார்.
இதையடுத்து நேற்று சென்னை மற்றும் புறநகர்களில் 43 இடங்களில் அமைந்துள்ள பஸ் நிலையங்களில் ஒரே நேரத்தில் அம்மா குடிநீர் விற்பனை தொடங்கியது.
கோயம்பேடு, பிராட்வே, அண்ணாநகர், பெருங்களத்தூர், தாம்பரம், எழும்பூர், தியாகராய நகர், ஆவடி, அம்பத்தூர், திருவொற்றியூர் உள்ளிட்ட 43 பஸ் நிலைய விற்பனை மையங்களிலும் ‘அம்மா குடிநீர்’ பாட்டிலை ஆயிரக்கணக்கான பொதுமக்கள் கேட்டு வாங்கினர்.
கடைகளில் விற்பனை தொடங்கிய 10 நிமிடங்களில் 10 ஆயிரம் குடிநீர் பாட்டில்கள் விற்று தீர்ந்து விட்டது. கோயம்பேடு பஸ் நிலையத்தில் மட்டும் 5 ஸ்டால்கள் அமைக்கப்பட்டு ஒரு ஸ்டாலுக்கு 200 வீதம் மொத்தம் 1000 பாட்டில்கள் வழங்கப்பட்டிருந்தது. இவை அனைத்தும் உடனே விற்று விட்டது.
இதே போல் சென்னை–ஸ்ரீரங்கம் கிளாசிக் விரைவு பஸ்களிலும் குடிநீர் பாட்டில்கள் விற்கப்பட்டது. பஸ்சில் இருந்த பயணிகள் ஆளுக்கு 1 பாட்டில்களை உடனே வாங்கி விட்டனர். 10 ரூபாய்க்கு ஒரு லிட்டர் பாட்டில் கிடைப்பதால் போட்டி போட்டு மக்கள் வாங்கியதை பார்க்க முடிந்தது.
அம்மா குடிநீர் பாட்டில் இன்று தமிழ்நாடு முழுவதும் விற்பனைக்கு வழங்கப்பட்டுள்ளது. இது குறித்து அரசு போக்குவரத்து கழக அதிகாரிகள் கூறியதாவது:–
அரசு விரைவு போக்குவரத்து கழகம் மற்றும் தமிழகம் முழுவதும் உள்ள 8 அரசு போக்குவரத்து கழகங்கள் சார்பிலும், அனைத்து பஸ் நிலையங்களிலும் விற்பனை மையங்கள் அமைக்கப்பட்டு அம்மா குடிநீர் பாட்டில்களை மக்களுக்கு கிடைக்க செய்துள்ளோம்.
அனைத்து தொலைதூர பஸ்களிலும் இன்று அம்மா குடிநீர் பாட்டில்கள் வழங்கப்பட்டுள்ளது. இது தவிர சாலையோர உணவகங்கள், ஓட்டல்களிலும் குடிநீர் பாட்டில்களை கிடைக்க செய்துள்ளோம்.
சென்னை மாநகர போக்குவரத்து கழகத்தின் சார்பில் 39 விற்பனை மையங்கள், அரசு விரைவு போக்குவரத்து கழகம் சார்பில் 12 மையங்கள், தமிழ்நாடு அரசு போக்குவரத்து கழகம் சார்பில் (விழுப்புரம்) 69 மையங்கள், கும்பகோணம் கோட்டம் சார்பில் 54, சேலம் கோட்டத்தில் 38, கோவை கோட்டத்தில் 39, மதுரை கோட்டத்தில் 31, திருநெல்வேலி கோட்டத்தில 22 என மொத்தம் 304 விற்பனை மையங்கள் அமைக்கப்பட்டுள்ளது.
இந்த விற்பனை மையங்கள் மூலம் தமிழ்நாட்டில் உள்ள 268 பஸ் நிலையங்களிலும், 36 சாலையோர உணவகங்களிலும் அம்மா குடிநீர் பாட்டில்களை கிடைக்க செய்துள்ளோம்.
இவ்வாறு அவர் கூறினார்.

நன்றி மாலைமலர்