ஒற்றையடி பாதை

-

 
ஒற்றையடி பாதையென்று
மெத்தனமாய் எண்ணாதீர்
வெற்றி வழி கண்டவர்கள்
விட்டுச் சென்ற தடயம் நான்.
முற்றுமில்லை முதலுமில்லை
நாளொரு நீளம் நகர்ந்தேன் நான்.
தேவர்களால் விரிக்கப்படவில்லை
நடந்தவர்களால்
உருவாக்கப்பட்டேன்.
முட்புதர்களுடன் மோதியவர்கள்
எழுதி முடித்த இதிகாசம் நான்!
வகுத்தவர்கள்
வழி நடத்துகின்றார்
பின் தொடர்ந்தவர்கள்
நிழற் குடைகள் தந்தார்.
மருகி நின்றோர்
முடங்கிவிட்டார்.
தயக்கம் கொண்டார்
தேக்கம் கண்டார்.
மலர் அலங்கரிக்கும் சாலைகளுக்கு
பெரிய இலக்குகள் இருப்பதில்லை.
நிழலும் வெயிலும்
பயணத்தில் பாதிப் பாதி
இயலும் இயலும்
இன்னும் எல்லைகள் விரிக.
சில வேளைகளில்
பல வேடங்களில்
உங்களை நீங்களே
என்னால் சந்திக்க நேரிடும்!
சீராகத் தேரோடுவதில்லை
நேரான பாதைகளும்
ஊர் போவதில்லை.
தர்மமும், அநீதியும்
சத்தியமும், சங்கடமும்
சந்திக்கும் பொழுதிலெல்லாம்
நெளிந்து வளைகின்றேன்,
எனக்கும் வேறு வழியில்லை!
மூளையின் கூர்முனை
விரல்கள் விரட்டும்.
ஆயினும் -
இதயக் காற்றின் திசையே வீசுங்கள்.
மேடு பள்ளங்கள் கண்டு துவளாதீர்
மேன்மைகள் இதோ விளிம்பில்தாம்
நேற்றைய பொழுது முள் என்றால்
இன்றைய சோலை பூத்திருக்கும்.
நெடுந்தூரப் பயணம் என்றாலும்
பழகும் பாதம் என்றாலும்
நடை போட நீ வந்தால்
உறுதுணையாய்
ஒற்றையடி பாதை
நானுண்டு!
- கற்பகம் இளங்கோவன்

:/ :/