உயர் மனித அபிவிருத்தி நாடுகளில் இலங்கைக்கு 73வது இடம் ; UNDP

இலங்கையின் மனித அபிவிருத்தி கடந்த காலங்களுடன் ஒப்பிடுகையில் பாரிய முன்னேற்றம் கண்டுள்ளதால், உயர் மனித அபிவிருத்தியுடைய நாடுகளின் பட்டியலில் இலங்கை 73ஆவது இடத்தை பிடித்திருப்பதாக ஐக்கிய நாடுகள் அபிவிருத்தி நிகழ்ச்சித் திட்டமான யு.என்.டி.பி. யின் 2014 ஆம் ஆண்டு அறிக்கையில் சுட்டிக்காட்டப்பட்டுள்ளது.

இந்த அறிக்கை கடந்த 24ம் திகதி டோக்கியோவில் வெளியிட்டு வைக்கப்பட்டது. “நிலையான மனித முன்னேற்றத்திற்கு பாதிப்புகளை குறைத்தல் மற்றும் பின்னடைவினை கட்டியெழுப்புதல்” என்னும் தொனிப் பொருளில் வெளியிடப்பட்டுள்ள இந்த அறிக்கையில் 187 நாடுகள் பற்றிய தரவுகள் உள்ளடக்கப்பட்டுள்ளன.

2014ஆம் ஆண்டிற்குரிய மனித அபிவிருத்தி அறிக்கையில் மக்களின் கருத்துக்களை ஊக்குவித்தல், மனித அபிவிருத்தி சாதனைகளை பாதுகாத்தல் மற்றும் மக்களை பாதிப்புக்குள்ளாக்கும் காரணிகள், பின்னடைவிலிருந்து மீளக்கூடிய வழிமுறைகள் ஆகிய விடயங்களுக்கு முன்னுரிமையளிக்கப்பட்டுள்ளன.

இலங்கையில் மனித அபிவிருத்தி சுட்டி 2014 ஆம் ஆண்டில் 0.750 வளர்ச்சியை எட்டியுள்ளது. இது 1980 இல் 0.513 ஆக விருந்தது. மனித அபிவிருத்தி பாரிய முன்னேற்றங் கண்டுள்ளதை இது காட்டி நிற்கின்றது.

187 நாடுகளினதும் சுகாதாரம் கல்வி மற்றும் வருமானம் பற்றிய தேசிய ஆய்வின் அடிப்படையில் மேற்கொள்ளப்பட்ட கணிப்பீட்டில் இலங்கை உயர் மனித அபிவிருத்தி நாடுகளின் பட்டியலில் 73 வது இடத்தை பெற்றுக் கொண்டுள்ள போதிலும் ஒன்பது தெற்காசிய நாடுகளினதும் முன்னணியில் இருக்கின்றது.

ஆசிய பிராந்தியத்தின் மனித அபிவிருத்தி சுட்டிக்கான சராசரிப் பெறுமானம் 0.588 ஆக காணப்படும் நிலையில் தெற்காசிய பிராந்தியத்தில் இலங்கையே சராசரியிலும் ஆகக்கூடிய சுட்டியைக் கொண்டுள்ளது.

இந்தியா மற்றும் அதன் ஏனைய உபகண்டங்களைப் போன்று இலங்கை காலனித்துவ ஆட்சியைக் கொண்டிருந்த போதிலும் நீண்டகால மோதல்களுக்குப் பின்னரும் கூட இதன் கல்வி மற்றும் சுகாதார நிலைமைகள் சர்வதேசத்திற்கு ஒப்பான வையென 2014 ஆம் ஆண்டு அறிக்கை கூறுகின்றது.

மேலும் இலங்கையின் கல்வியறிவு வீதம். எதிர்பார்க்கப்படும் வயதெல்லை பாடசாலைக்கு செல்லும் வருடங்கள் ஆகியனவும் உயர் மனித அபிவிருத்தி குழுமத்திற்குள் அங்கம் வகிப்பதற்கு முக்கிய காரணிகளாக அமைந்துள்ளன.

இலங்கையின் அயல் நாடான இந்தியா, நடுத்தர அபிவிருத்தி நாடுகளுள் 135 வது இடத்தை பெற்றுள்ள நிலையில் குறைந்த அபிவிருத்தி பிரிவில் பூட்டான் 136வது இடத்தையும் மாலைதீவு 103 வது இடத்தையும் பாகிஸ்தான் 146, நேபாளம் 145, ஆப்கானிஸ்தான் 169 ஆகிய இடங்களையும் பெற்றுக் கொண்டுள்ளன.

தெற்காசியாவில் வறுமை கோட்டிற்கு கீழ் 800 மில்லியன் மக்களும் வறுமை கோட்டினை அண்மித்த நிலையில் 270 மில்லியன் மக்களும் வாழ்கின்றனர். இது உலகிலேயே 56 சதவீதமான வறுமை கோட்டிற்கு கீழே வாழ்பவர்களினதும் 35 சதவீதமான வறுமை கோட்டிற்கு அண்மித்த நிலையில் வாழ்பவர்களினதும் இருப்பிடமாகவுள்ளது.

இதேவேளை ஆசியா மற்றும் பசுபிக் பிராந்தியங்களில் மனித அபிவிருத்திக்கு வறுமை, சமத்துமின்மை மற்றும் அடிக்கடி இடம்பெறும் இயற்கை அனர்த்தங்களே பாரிய சவாலாக இருப்பதாகவும் 2014 ஆம் ஆண்டிற்கான மனித அபிவிருத்தி அறிக்கையில் குறிப்பிடப்பட்டுள்ளது.

இத்தகைய பாதிப்புக்கள் மனித அபிவிருத்திக்கு அச்சுறுத்தலாக அமைந் துள்ளமை இதன்மூலம் தெளிவாகியுள்ள அதேநேரம். இவை முறையாக முகாமைத்துவம் செய்யப்படாவிடின் முன்னேற்றமானது சிறந்த பெறுபேற்றினைக் கொண்டதாகவோ நிரந்தரமானதாகவோ இருக்கமாட்டாது என்பதனையும் சுட்டிக் காட்டுகின்றது.

மேலும் 2014 ஆம் ஆண்டிற்கான மனித அபிவிருத்தி அறிக்கையில் முதற்தடவையாக பால் அபிவிருத்தி சுட்டி அறிமுகம் செய்து வைக்கப்பட்டுள்ளது. இது 148 நாடுகளில் ஆண்கள் மற்றும் பெண்களுக்கென தனியான கணக்கெடுப்புக்களை மேற்கொண்டு மனித அபிவிருத்தி சுட்டியுடன் ஒப்பிடப் பட்டுள்ளது.

இதனடிப்படையில் பால் அபிவிருத்தி சுட்டியில் 66வது இடத்தை பிடித்திருக்கும் இலங்கை பெண்கள் 0.720 இணையும் ஆண்கள் 0.750 இணையும் மனித அபிவிருத்தி சுட்டியாக கொண்டுள்ளனர்.

நோர்வே, அவுஸ்திரேலியா, சுவிற்சர்லாந்து, நெதர்லாந்து, அமெரிக்கா ஆகிய 05 நாடுகளுமே மனித அபிவிருத்தி சுட்டியின் முதல் ஐந்து இடங்களைப் பிடித்துள்ளன.

இதேவேளை நைகர், கொங்கோ ஜனநாயக குடியரசு, மத்திய ஆபிரிக்க குடியரசு, சாட் மற்றும் சிரலியோன் ஆகிய நாடுகள் மனித அபிவிருத்திச் சுட்டிப் பட்டியலில் ஆக கீழ் மட்டத்திலுள்ள ஐந்து நாடுகளாகும்.

நன்றி தினகரன்..

நமக்கு கீழே உள்ளவர் கோடி!
நினைத்து பார்த்து நிம்மதி தேடு

என்றோ சொன்னது இன்று நினைவுக்கு வருகின்றது! இலங்கையை விட மோசமான வாழ்வதற்கே தகுதியில்லா நாடுகள் பலவிருக்க நம் நாட்டு மக்கள் தம் உயிரை பணயம் வைத்து கடன் வாங்கி கடலிலும் காட்டிலும் தம் உயிரை விடுகின்றார்கள்1