நகை கடை ஊழியரிடம் 140 சவரன் கொள்ளை : 6 பேர் கும்பல் தப்பி ஓட்டம்

by **ராகவா** Sun 10 Aug 2014 - 16:40

பரமக்குடி : ராமநாதபுரம், பரமக்குடி அருகே பஸ்சில் சென்ற மதுரை நகைக்கடை ஊழியர்களிடம், 140 சவரன் நகைகள் கொள்ளையடிக்கப்பட்டன. அதே பஸ்சில் வந்த இருவர் உட்பட ஆறு பேர், தப்பி ஓடினர். மதுரையைச் சேர்ந்த சரவணன், 45, பிச்சைமணி, 55, ஆகிய இருவரும், செல்லம் அங்கம்மாள் ஜுவல்லர்சில் பணிபுரிகின்றனர். நேற்று காலை, ராமநாதபுரத்திற்கு, 140 சவரன் நகைகளை, அரசு பஸ்சில் கொண்டு சென்றனர்; பஸ்சில், 46 பேர் பயணித்தனர். கமுதக்குடி ரயில்வே கிராசிங் வேகத்தடையில் பஸ் மெதுவாகச் சென்றபோது, இரண்டு டூவிலர்களில் வந்த நான்கு பேரில் இருவர், பஸ்சில் ஏறினர். அப்போது, நகைக்கடை ஊழியர் சரவணன் கீழே வைத்திருந்த நகைப் பையை, பின்னால் அமர்ந்திருந்த நபர் ஒருவர், காலால் இழுத்தார். சுதாரித்த சரவணன், பையை இறுக்கிப் பிடித்தார்.
உடனே, பின்னால் இருந்த இருவர் எழுந்து வந்து, சரவணன் கையில் அரிவாளால் வெட்டி, பையை பறித்தனர். அவர்களுடன், ரயில்வே கிராசிங்கில் ஏறிய இருவரும் சேர்ந்து, பையை பறித்து தப்ப முயன்றனர். பயணிகள் இருவர் தடுக்க, அவர்களையும் அரிவாள் பின்புறத்தால் தாக்கினர். இதற்குள் பஸ், ரயில்வே கிராசிங்கின் மறுபுறம் உள்ள வேகத்தடையில் மெதுவாக சென்ற போது நான்கு பேரும் இறங்கி, அங்கு ஏற்கனவே நின்றிருந்த இருவருடன் சேர்ந்து, டூவீலர்களில் தப்பினர். இதுகுறித்து, நகைக் கடை ஊழியர்களிடம் விசாரணை நடத்திய
டி.எஸ்.பி., வினோத் சாந்தாராம் கூறுகையில், ''கொள்ளையர்களுக்கு, 25 முதல் 30 வயது இருக்கும். இவர்கள் குறிப்பிட்ட எல்லையை தாண்டி செல்ல வாய்ப்பில்லை. அவர்கள் பயன்படுத்திய ஒரு டூவீலரின் எண், போலி என தெரிந்து உள்ளது,'' என்றார்.

நன்றி:தினமலர்