வங்கி மேலாளர் தப்பி ஓட்டம் டிரைவரை அடித்து போட்டு காரை கடத்திய போதை கும்பல்

by **முனாஸ் சுலைமான்** Sat 1 Oct 2011 - 20:24

டிரைவரை அடித்து போட்டு விட்டு காரை கடத்தி சென்ற 4 போதை ஆசாமிகளை போலீசார் கைது செய்தனர். திருவள்ளூர் ஸ்டேட் வங்கி கிளையில் மேனேஜராக இருப்பவர் பார்த்தசாரதி (50).

வேலை விஷயமாக சென்னை பாரிமுனையில் உள்ள வங்கி தலைமை அலுவலகத்துக்கு நேற்று காரில் வந்தார். காரை, குமார் (52) என்பவர் ஓட்டி வந்தார். அலுவலகத்தில் வேலை முடிந்ததும் ஐசிஎப் பொது மேலாளரை சந்தித்து, ஊழியர் கடன் விஷயமாக பேச திட்டமிட்டிருந்தார்.

இதற்காக நியூ ஆவடி ரோட்டில் காரில் சென்று கொண்டிருந்தார். வழி தெரியாமல் அயனாவரம் வீராசாமி தெருவில் நுழைந்து விட்டனர். ஐசிஎப் பகுதிக்கு எப்படி செல்ல வேண்டும் என்று அங்கு நின்ற 4 வாலிபர்களை கேட்டுள்ளனர்.

அதற்கு அந்த வாலிபர்கள், ‘இந்த வழியாக போகக் கூடாது. நியூ ஆவடி சாலை வழியாக செல்ல வேண்டும்’ என்று கூறினர். எனவே டிரைவர் குமார் காரை பின்னோக்கி எடுத்தார். கார், வழிகாட்டியவர்கள் மீது லேசாக இடித்து விட்டது.

போதையில் இருந்த அவர்கள், டிரைவரை காரில் இருந்து வெளியே இழுத்து சரமாரியாக தாக்கினர். டிரைவர் குமார் படுகாயம் அடைந்தார். பயந்துபோன மேனேஜர் பார்த்தசாரதி, தப்பி ஓடிவிட்டார்.

பின்னர் அந்த கும்பல், குமாரிடம் இருந்து சாவியை பிடுங்கி, காரை எடுத்துக் கொண்டு தப்பி விட்டனர். தகவலறிந்த அயனாவரம் போலீசார் சம்பவ இடத்துக்கு சென்று விசாரித்தனர்.

காயமடைந்த குமாரை மருத்துவமனைக்கு அனுப்பினர். கடத்தப்பட்ட காரை பிடிக்க போலீசார் ஜீப்பில் தேடினர். செங்குன்றம் பகுதியில் காரை சுற்றிவளைத்தனர்.

போதையில் இருந்த 4 பேரையும் கைது செய்து விசாரித்தனர். வடபெரும்பாக்கத்தை சேர்ந்த மாறன் (30), ரகு (28), ராமன் (29), தாமரைக்கனி (29) என விசாரணையில் தெரியவந்தது. போலீசார், 4 பேரையும் கைது செய்து சிறையில் அடைத்தனர்.