அக்கா வருதில்லை இப்போது….

by **rammalar** Tue 22 Mar 2016 - 13:25

-
பஞ்சடைந்த இடுங்கிய கண்கள்
பை நிறைய சுருட்டித் திணித்த துணிகள்
மாதத்திற்கு ஒருமுறை முதல் பேருந்தில்
மூன்று குழந்தைகளுடன் வந்து நிற்பாள்.
–
மல்லிகைச் சரத்தையும் மிக்சரையும்
எடுத்துக் கொடுத்தபடி
‘‘சும்மாதான் பாத்திட்டு போகலாம்னு
வந்தேன்’’ என்பாள்.
பின் கழுத்தில் முடியுடன் ஒட்டி
ரத்தம் உலர்ந்திருக்கும்.
–
வீக்கம் தெரியாது
இழுத்துப் போர்த்தி
நெற்றி புடைத்திருப்பதற்கு
கண்ணீரை உள்வாங்கி
குளியலறையில் வழுக்கி விழுந்ததாய்
விளக்கம் சொல்வாள்.
–
பேயறைந்தாற் போல் நிற்கும்
பிள்ளைகளை அதட்டி
தூங்கச் சொல்வாள்.
எப்படிப் பார்த்தாலும்
இரண்டு நாட்களுக்கு மேல்
இருப்புக் கொள்ளாது அவளுக்கு
‘‘புள்ளைங்க படிப்பு கெட்டுப் போயிடும்
சீட்டுக் காசையும் எடுத்து குடிச்சிருவாரு’’
என பரபரத்துப் புறப்படும்
–
அவள் நடையில் மிடுக்கு தெறிக்கும்.
‘‘குடிக்க காசு தரலைன்னு
அம்மாவை அப்பா அடிச்சு
அம்மாவிற்கு மயக்கமே வந்துடுச்சு.
பக்கத்து வீட்டுல ஒளிஞ்சிருந்து
பஸ் ஏறினோம்’’ என்று
பிள்ளைகள் எங்களிடம்
சொல்லியது அறியாது.
–
இப்போதெல்லாம் அக்கா வருவதில்லை
‘குடிச்சு குடிச்சே
அந்த மனுஷனும்
போய்ச் சேர்ந்திட்டாரு’ என
தொண்டை வறள
அவள் அழுத அழுகை
அடக்க முடியாத
சிரிப்பு சத்தமாய்
எனக்குக் கேட்டதிலிருந்து
அக்கா வருவதில்லை.
–
——————–
இளம்பிறை
நன்றி- குங்குமம்