மும்பையில் புதிய நீர்மூழ்கி கப்பல் அறிமுகம் விரைவில் கடற்படையில் சேர்ப்பு

by **rammalar** Sun 15 Jan 2017 - 18:42

-

மும்பை,

மும்பையில் ‘ஐ.என்.எஸ். கந்தேரி’ என்ற புதிய நீர்மூழ்கி கப்பல் அறிமுகம் செய்து வைக்கப்பட்டது. இது விரைவில் கடற்படையில் சேர்க்கப்படும் என எதிர்பார்க்கப்படுகிறது.

‘திட்டம் 75’
மும்பையில் உள்ள ‘மசாகன்’ கப்பல் கட்டும் நிறுவனம் (எம்.டி.எல்.), பிரெஞ்சு நிறுவனமான டி.சி.என்.எஸ்.சின் ஒத்துழைப்புடன் இந்திய கடற்படைக்கு நீர்மூழ்கி கப்பல்களை கட்டும் பணிகளை மேற்கொண்டு வருகிறது. ‘திட்டம் 75’ என்று பெயரிடப்பட்டு உள்ள இந்த திட்டத்தின் கீழ் 6 ஸ்கார்ப்பீன் வகை நீர்மூழ்கி கப்பல்கள் கட்ட திட்டமிடப்பட்டு உள்ளது.

அதன்படி ‘ஐ.என்.எஸ். கல்வாரி’ என பெயரிடப்பட்ட நீர்மூழ்கி கப்பல் ஏற்கனவே கட்டி முடிக்கப்பட்டு சமீபத்தில் தொடங்கி வைக்கப்பட்டது.

பாதுகாப்பு இணை மந்திரி
இந்த திட்டத்தின் 2–வது நீர்மூழ்கி கப்பலான ‘ஐ.என்.எஸ். கந்தேரி’யின் கட்டுமானப்பணிகள் அனைத்தும் முடிக்கப்பட்டு அறிமுகத்துக்கு தயாராகி இருந்தது. இதன் அறிமுக விழா நேற்று மும்பையில் உள்ள மசாகன் கப்பல் கட்டும் தளத்தில் நடந்தது.

இதில் ராணுவ இணை மந்திரி சுபாஷ் பாம்ரே சிறப்பு விருந்தினராக கலந்து கொண்டார். அவரது மனைவி பினா பாம்ரே, ஐ.என்.எஸ். கந்தேரி நீர்மூழ்கி கப்பலை முறைப்படி தொடங்கி வைத்தார். நிகழ்ச்சியில் கடற்படை தளபதி அட்மிரல் சுனில் லண்பா மற்றும் உயர் அதிகாரிகள் கலந்து கொண்டனர்.

மரபு சார்ந்த நீர்மூழ்கிகள்
தற்போது அறிமுகம் செய்யப்பட்டு உள்ள இந்த ஐ.என்.எஸ். கந்தேரி நீர்மூழ்கி கப்பல், விரைவில் அதாவது இந்த ஆண்டு இறுதிக்குள் கடற்படையில் சேர்க்கப்படும் என எதிர்பார்க்கப்படுகிறது. இத்தகைய நீர்மூழ்கி கப்பல்கள் கடற்படையின் மரபு சார்ந்த நீர்மூழ்கிகளின் மையமாக இருக்கும் என கடற்படை அதிகாரிகள் தெரிவித்தனர்.

இந்த நீர்மூழ்கிக்கு சூட்டப்பட்டுள்ள ‘கந்தேரி’ என்ற பெயர், கடந்த 1989–ம் ஆண்டு கடற்படையில் இருந்து வாபஸ் பெறப்பட்ட ‘பாக்ஸ்டார்ட்’ ரக நீர்மூழ்கி கப்பல் ஒன்றின் பெயர் என்பது குறிப்பிடத்தக்கது.
-
தினத்தந்தி