வானொலி பேட்டியில், நடிகர் நாகேஷ் கூறியது:

by **rammalar** Sun 10 Mar 2019 - 20:01

'நியாயமாக உங்களுக்கு வரவேண்டிய நல்ல பெயர்
மற்றவர்களுக்கு செல்லும்போது, உங்களுக்கு எப்படி
இருக்கும்?'

அதற்கு நாகேஷ்,
'நான் கவலையே படமாட்டேன் சார்... ஒரு கட்டடம்
கட்டும்போது, சவுக்கு மரத்தை வச்சு சாரம் கட்டி,
குறுக்கே பலகைகள் போட்டு, அதன் மேல், பல
சித்தாள்கள் நின்னு, கட்டட வேலை செய்வர்.

பல ஆண்டுகளுக்கு பின், கட்டடம் கட்டி முடித்த பிறகு,
வர்ணங்கள் பூசி, கீழே இறங்கும்போது, ஒவ்வொரு
சவுக்கு மரமாக அவிழ்த்தபடி வருவர்.

'கிரஹப்பிரவேசத்தன்று, கட்டடம் கட்டுவதற்கு,
எது முக்கிய காரணமாக இருந்ததோ, அந்த சவுக்கு
மரத்தை, யார் கண்ணிலும் படாமல் எங்கேயோ
மறைத்து வைத்து, வேறெங்கோ வளர்ந்த வாழை
மரத்தை, இல்லம் முன் நட்டு வைத்து, விழா நடத்தி,
அனைவரையும் வரவேற்பர்.

அத்தனை பெருமையும், வாழை மரத்துக்கே போய்
சேரும்.

'இதில் உள்ள உண்மை என்ன தெரியுமா?
அந்த வாழை மரத்துக்கு, மூன்று நாள் தான் வாழ்க்கை.
ஆடு, மாடுகள் மேயும், குழந்தைகள் பிய்த்தெடுப்பர்,
பிறகு, குப்பை வண்டியில் போய் சேரும்.

'மறைந்து கிடக்கிறதே, அந்த சவுக்கு மரம், கண்ணீர்
விடுவதில்லை. அடுத்த கட்டடம் கட்டுவதற்கு தயார்
நிலையில், என்றைக்கும் சிரித்தபடியே இருக்கும்!'
-
-------------------------------
நடுத்தெரு நாராயணன்
நன்றி-வாரமலர்