உலக சைக்கிள் தினத்தை முன்னிட்டு ஆழ்கடலில் சைக்கிள் ஓட்டி சாதனை

by **rammalar** Fri 4 Jun 2021 - 5:22

சென்னை :
உலக சைக்கிள் தினத்தை முன்னிட்டு, நீலாங்கரையை சேர்ந்த
ஆழ்கடல் பயிற்சியாளர் அரவிந்த், சுவாச உபகரணங்கள்
இல்லாமல், ஆழ்கடலில் சைக்கிள் ஓட்டி சாதனை படைத்துள்ளார்.

நேற்று, உலக சைக்கிள் தினம் அனுசரிக்கப்பட்டது.
உடல் ஆரோக்கியம், புத்துணர்ச்சி, சுற்றுச்சூழல் பாதுகாப்பை
வலியுறுத்தி, இத்தினம் சிறப்பிக்கப்படுகிறது.

கடல் வளம் பாதுகாப்பு மற்றும் உடல் ஆரோக்கியத்தை வலியுறுத்தி,
சென்னை, நீலாங்கரையை சேர்ந்த ஆழ்கடல் பயிற்சியாளர் அரவிந்த்,
ஆழ்கடலில் சைக்கிள் ஓட்டி விழிப்புணர்வு ஏற்படுத்தினார்

.நீலாங்கரை கடற்கரையில் இருந்து, 6 கி.மீ., துாரம் கடலில், 55 அடி
ஆழத்தில் சைக்கிள் ஓட்டினார்.

பொதுவாக, ஆழ்கடல் செல்வோர் சுவாச உபகரணங்களுடன்
செல்வர். மூச்சை தம் பிடித்து, சைக்கிளில் ஆழ்கடல் சென்ற இவர்,
பாறை மற்றும் மணல் பரப்பு இடையே, இரண்டரை நிமிடம் சைக்கிள்
ஓட்டி உள்ளார்

.இது குறித்து, ஆழ்கடல் பயிற்சியாளர் எஸ்.பி.அரவிந்த், 40,
கூறியதாவது:

சிறு வயதில் இருந்தே சைக்கிள் ஓட்டும் பழக்கம் உடையவன்.
அதோடு, 16 ஆண்டுகளாக ஆழ்கடல் பயற்சி அளித்து வருகிறேன்.
ஏற்கனவே, என்னிடம் பயிற்சி எடுத்த, ஒரு ஐ.டி., ஊழியர், பிப்.,
மாதம் ஆழ்கடலில் திருமணம் செய்தார்.

அதன்பின், ஆழ்கடலில் உடற்பயிற்சி, குப்பை அகற்றுவது போன்ற
நிகழ்ச்சிகள் நடத்தி உள்ளேன். ஒவ்வொரு முறையும், கடலோர
பாதுகாப்பு படை அனுமதி பெற்று தான், ஆழ்கடலில் இறங்குவேன்.

கடல் வளம் பாதுகாப்பை வலியுறுத்தி தான், ஒவ்வொரு நிகழ்ச்சியும்
நடத்துகிறேன்.இவ்வாறு அவர் கூறினார்.

தினமலர்