’பட’ – மலையாளப்படம்

கடந்த பத்து வருடங்களில் வெளியான சிறந்த அரசியல்
படங்களைப் பட்டியலிட்டால் நிச்சயம் ‘பட’ எனும்
மலையாளப்படத்துக்கு முதன்மையான ஓர் இடம் இருக்கும்.
‘அமேசான் ப்ரைமி’ல் காணக்கிடைக்கிறது இந்தப் படம்.

வெவ்வெறு இடங்களைச் சேர்ந்த நான்கு பேர், ஏதொவொரு
முக்கியமான வேலைக்காகத் தயாராகின்றனர். தங்களது
திட்டப்படி எல்லாம் தயாரானதும் நால்வரும் கலெக்டர்
அலுவலத்தில் ஒன்று சேர்கின்றனர்.
கலெக்டர் வரும் வரை காத்திருக்கின்றனர்.

நெடு நேர காத்திருப்புக்குப் பின் கலெக்டர் வருகிறார்.
கலெக்டருக்கு இருக்கும் பலத்த பாதுகாப்பை தகர்ந்தெறிந்து,
கையில் ஆயுதங்களுடன் சென்று கலெக்டரைப் பணயக்
கைதியாக்குகின்றனர்.

அந்த நால்வரும் யார்… அவர்களுக்குப் பின்னணியில் யார்
இருக்கிறார்கள்… கலெக்டரை ஏன் பணயக்கைதி
ஆக்கினார்கள்… என்பதற்கான பதிலாக விரிகிறது
திரைக்கதை.

1996ம் வருடம் போராளிகள் சிலர் பழங்குடிகளின் நிலம்
சம்பந்தமான சட்டத் திருத்தக் கோரிக்கைகளுக்காக,
பாலக்காடு கலெக்டரைப் பணயக் கைதியாக்கிய சம்பவத்தை
அடிப்படையாக வைத்து உருவாகியிருக்கிறது இந்தப் படம்.

குஞ்சாக்கோ போபன், விநாயகன், ஜோஜு ஜார்ஜ், திலீஷ்
போத்தன் என நட்சத்திரப் பட்டாளங்களுடன்
களமிறங்கியிருக்கும் இப்படத்தை இயக்கியவர் கமல் கே.எம்.

-குங்குமம்