தலைமுறை தலை நிமிர்ந்து நடக்கும்!. - கவிதை

by **rammalar** Wed 20 Sep 2023 - 11:26

-
லட்சியத்தை அடைய
அனுபவங்கள் அவசியமில்லை
தன்னம்பிக்கை உணர்வோடு
தொடரும் விடாமுயற்சியும்
தடைப்படாத பயிற்சியும்
இலக்கை எளிதாக
தொட வைக்கும்!
-
உச்சத்தில் கொடி கட்டி பறக்க
சிறகுகள் தேவையில்லை
நுணுக்கமான அறிவும்
நுாதன சிந்தனையும்
நினைப்பதை முழுமையாக
நிறைவேற்றி வைக்கும்!
-
வாழ்க்கையில் வசந்தம் வீச
தென்றல் காற்று தேவையில்லை
மன கசப்புகளை குழி தோண்டி
மண்ணுக்குள் புதைத்து
கள்ள கபடமில்லாத
உள்ளத்தோடு பேச
கவலைகள் யாவும்
தானாக கரைந்து
இனிமையான வாழ்க்கை உதயமாகும்!
-
சமூகத்தில் சுமூகமான
மாற்றத்தை கொண்டு வர
போராட்டங்கள் அவசியமில்லை
சிந்தனைக்கு உயிர் கொடுத்து
செயலில் வேகம் காட்ட
சாதிக்கும் வல்லமை அதிகரிக்கும்!
-
கொடியவனை வீழ்த்த
ஆயுதங்கள் தேவையில்லை
கோபத்தை கட்டுக்குள் வைத்து
பொறுமையோடு பயணித்தால்
எதிரி நம் காலடியில் வீழ்வான்!
-
நல்ல மனிதன் என்று பெயரெடுக்க
விளம்பரங்கள் அவசியமில்லை
கர்மத்தை விட்டொழித்து
தர்ம சிந்தனையை வளர்த்தால்
தலைமுறை தலை நிமிர்ந்து நடக்கும்!
-
-எஸ்.மூர்த்தி, கோவை
நன்றி-வாரமலர்