இலங்கைக் கிரிக்கட் சாரதியும் ராஜினாமா! அஜந்த மெண்டிஸ் அவுஸ்திரேலியாவுக்கு! சூனியமாகும் எதிர்காலம்?

இலங்கைக் கிரிக்கட் நிர்வாகிகள் அனைவரும் ஒருவர் பின் ஒருவராக ராஜினாமாச் செய்யும் நிலையில் அதன் சாரதியும் ராஜினாமாச் செய்துள்ளார்.
உலகக்கிண்ண தோல்வியையடுத்தே தான் அவ்வாறான ஒரு முடிவை எடுத்ததாக இலங்கைக் கிரிக்கட் சபையின் பிரதான சாரதியாக இருந்த கீர்த்தி பீரிஸ் தனது ராஜினாமாக் கடிதத்தில் தெரிவித்துள்ளார்.

கிரிக்கட் நிர்வாகம் முற்றுமுழுதாக புதிதாக ஸ்தாபிக்கப்பட உள்ள நிலையில் தனது ராஜினாமாவும் அதற்கு ஓரளவேனும் துணை செய்யும் என்று தான் எதிர்பார்ப்பதாகவும் அவர் மேலும் குறிப்பிட்டுள்ளார்.

இதற்கிடையே இலங்கை கிரிக்கட் அணியின் சுழற்பந்து வீச்சாளரான அஜந்த மெண்டிஸ் அணியை விட்டு விலகி அவுஸ்திரேலியா செல்லவுள்ளதாக ஊர்ஜிதப்படுத்தப்படாத இரகசிய தகவல்கள் வெளியாகியுள்ளன.

ஆரம்பத்தில் விக்டோரியா பிராந்திய அணியின் வெளிநாட்டு வீரராக இணைந்து கொள்ளவுள்ள அவர், அதன் பின் ஒரு வருட காலத்துக்குள் அவுஸ்திரேலியா தேசிய அணியில் உள்வாங்கப்படவுள்ளதாகவும் பிரஸ்தாப தகவல் வட்டாரங்கள் தெரிவிக்கின்றன.

ஜனாதிபதி மஹிந்த ராஜபக்ஷ மற்றும் அவரது புதல்வர் நாமல் ராஜபக்ஷ ஆகியோர் இலங்கைக் கிரிக்கட் நிர்வாகத்தில் தலையிடத் தொடங்கியுள்ளமைக்கு எதிர்ப்புத் தெரிவிக்கும் வகையிலேயே அதில் அங்கம் வகிப்பவர்கள் ஒவ்வொருவராக விலகிச் செல்ல முற்படுவதாக கிரிக்கட் சபை வட்டாரங்களிலிருந்து தெரிய வருகின்றது.