தினமும் 7000 குழந்தைகள் இறந்தே பிறக்கின்றன: ஆய்வுத் தகவல்

by *சம்ஸ் Fri 15 Apr 2011 - 16:30

உலகில் ஒவ்வொரு நாளும் ஏறத்தாழ 7000 குழந்தைகள் இறந்தே பிறக்கின்றன என மருத்துவத் துறை நாளிதழான லான்செட் தனது ஆய்வறிக்கையில் தெரிவித்துள்ளது.
2009ம் ஆண்டுக்கான ஆய்வை ஆதாரமாகக் கொண்டு இந்த தகவலை லான்செட் மருத்துவ இதழ் வெளியிட்டுள்ளது. இந்த ஆய்வறிக்கையின்படி 2009ம் ஆண்டில் 26 லட்சத்துக்கும் மேற்பட்ட குழந்தைகள் இறந்தே பிறந்தன. இதில் ஏறத்தாழ 5000 இறப்புகள்(70 சதவீதம்), இந்தியா, சீனா, வங்கதேசம் உள்ளிட்ட 10 நாடுகளில் நிகழ்ந்தன.

ஆயினும் இவ்வகையிலான இறப்புகள் குறைந்து வருவதும் குறிப்பிடத்தக்கது. 1995ம் ஆண்டு இறந்து பிறந்த குழந்தைகளின் எண்ணிக்கை 30 லட்சமாகும். அதே வேளையில் 2009ல் 26 லட்சமாக இந்த எண்ணிக்கை குறைந்துள்ளது.

பிரசவத்தின் போது முறையான மருத்துவ ஆலோசனைகளும், உதவிகளும் கிடைக்காததே இதற்குக் காரணம். அதே சமயம் மருத்துவ, உடல் ரீதியான காரணங்களும் உள்ளன என இந்த அறிக்கை கூறுகிறது.

கருத்தரித்துள்ள காலத்தில் தாய்க்கு வரக்கூடிய நோய்கள், ஏற்கெனவே உயர் ரத்த அழுத்தம், நீரிழிவு போன்ற நோய்கள் தாய்க்கு இருப்பது, சிசு வளர்வதில் உள்ள உடல் ரீதியான தடைகள், கருத்தரிப்பு காலத்தில் சிசுவுக்கு ஏற்படும் குறைகள் இவற்றுடன் பிரசவ காலத்தில் ஏற்படும் சிக்கல்களும் குழந்தைகள் இறந்தே பிறப்பதற்கான முக்கிய மருத்துவக் காரணங்களாகக் கூறப்படுகின்றன.

பின்லாந்து நாட்டில் 1,000 பிரசவங்களுக்கு 2 இறப்புகளே சம்பவிக்கின்றன. அதே சமயம் இந்தியாவில் 1,000க்கு 20 முதல் 66 சிசுக்கள் இறந்தே பிறக்கின்றன என லான்செட் அறிக்கை தெரிவிக்கிறது.