ஏற்கனவே இணங்கப்பட்ட விடயங்கள் செயற்படுத்தப்படவில்லை!- தமிழ் கூட்டமைப்பு அரசுக்கு இன்று கண்டனம் தெரிவிக்கும்!

தமிழ் தேசிய கூட்டமைப்புக்கும் அரசாங்கத்துக்கும் இடையிலான பேச்சு வார்த்தை ஒன்று இன்றைய தினம் நடைபெறவுள்ளது. இதன்போது ஏற்கனவே பேசி இணக்கம் காணப்பட்ட விடயங்கள் இதுவரை செயற்படுத்தப்படாதது தொடர்பில் ஆட்சேபனை தெரிவிக்கும் என தமிழ் தேசிய கூட்டமைப்பின் தகவல்கள் தெரிவிக்கின்றன.
இன்றைய சந்திப்பின் போது அரசியல் தீர்வு குறித்த விடயங்கள் பேசப்படும் என முன்னர் கூறப்பட்டது.

எனினும், ஏற்கனவே அரசாங்கத்துடன் பேசி இணக்கம் காணப்பட்ட விடயங்கள் இதுவரையில் செயற்படுத்தப்படாத நிலையில், அது தொடர்பில் ஆட்சேபனை தெரிவிக்கும் வகையில் இந்த கூட்டம் இடம்பெறும் என தமிழ் தேசிய கூட்டமைப்பின் தகவல்கள் தெரிவிக்கின்றன.

குறிப்பாக சிறைகளில் உள்ள தமிழ் அரசியல் கைதிகளின் பெயர் பட்டியலை வெளியிடுவதாக அரசாங்கம் கடந்த பேச்சுவார்த்தைகளின் போது உறுதியளித்திருந்தது.எனினும் இதுவரையில் அவர்கள் குறித்த விபரங்கள் எதுவும் வெளியிடப்படவில்லை.

இந்த நிலையில், இவ்வாறான விடயங்கள் குறித்தும் இன்றைய தினம் பேசப்படும் என தகவல்கள் தெரிவிக்கின்றன.

இந்த சந்திப்பின் போது, தமிழ் தேசிய கூட்டமைப்பின் நாடாளுமன்ற குழுத் தலைவர் ஆர்.சம்பந்தனுடன், ஏ.எஸ்.சுமந்திரன், சுரேஷ் பிரேமசந்திரன் மற்றும் மாவை சேனாதிராஜா ஆகியோர் கலந்து கொள்ளவுள்ளனர்.