வெலிக்கடைச் சிறைச்சாலைக் கைதிகளுடன் இந்திய பாகிஸ்தான் கைதிகளும் உண்ணாவிரதம்

by **veel** Tue 24 May 2011 - 22:53

வெலிக்கடைச் சிறைச்சாலைக் கைதிகளுடன் இந்திய பாகிஸ்தான் கைதிகளும் உண்ணாவிரதம்

இலங்கை சிறைச்சாலைகளில் உண்ணாவிரதம் மேற்கொண்டுவரும் கைதிகளில் இந்திய மற்றும் பாகிஸ்தானைச் சேர்ந்தவர்களும் அடங்குவதாக இந்தியரான கைதியொருவர் தெரிவித்துள்ளார்.

கொழும்பு வெலிக்கடை சிறைச்சாலையில் மே 19 ஆம் திகதி முதல் இந்த உண்ணாவிரதம் மேற்கொள்ளப்படுவதாக தம்மை இனங்காட்ட விரும்பாத இக்கைதி, சிறைக் காவலர் ஒருவர் வழங்கிய செல்லிடத் தொலைபேசி மூலம் கூறியதாக இந்தியாவின் ஐ.ஏ.என்.எஸ். செய்திச்சேவை தெரிவித்துள்ளது.

தம்மை விரைவாக தாயகத்திற்கு அனுப்பக்கோரி இந்த உண்ணாவிரதம் மேற்கொள்ளப்படுவதாகவும் அக்கைதி தெரிவித்துள்ளார்.

இலங்கையை சேர்ந்த ஆயிரக்கணக்கான கைதிகளும் உண்ணாவிரதம் மேற்கொள்வதாகவும் ஆனால் அவை ஊடகங்களில் வெளிவரவில்லை எனவும் அவர் கூறியுள்ளார்.

உணவு உட்கொள்ளாத கைதிகள் சிலர் வைத்தியசாலைக்கு கொண்டு செல்லப்பட்டுள்ளனர். சில கைதிகள் உடல்நல காரணங்களால் உண்ணாவிரதத்தில் பங்குபற்றவில்லை எனவும் அவர்கூறியுள்ளார்.