எந்திரன்… எவ்வளவுதான் வசூலாச்சு? – ஒரு விரிவான ரிப்போர்ட்

by **எந்திரன்** Tue 14 Dec 2010 - 19:53

சூப்பர் ஸ்டார் ரஜினியின் எந்திரன் ரிலீஸான தினத்திலிருந்து இன்று வரை, நாட்டின் பிரதான நாளேடுகள், இணையதளங்களில், படத்தின் உலகளாவிய வசூல் குறித்து தொடர்ச்சியாக செய்திக் கட்டுரைகள் வெளியாகி வருகின்றன.

டைம்ஸ் ஆப் இந்தியா, ஹிந்துஸ்தான் டைம்ஸ், சிஃபி, ஒன் இந்தியா, இந்தியா டுடே, ரீடிஃப், என்டிடிவி, அவ்வளவு ஏன் பிபிசி, தி இன்டிபெண்டன்ட் போன்ற வெளிநாட்டு மீடியாக்களும் கூட தங்களுக்குக் கிடைத்த தகவல்களின் அடிப்படையில் இந்தச் செய்திகளை தொடர்ந்து வெளியிடுகின்றன. வேறு எந்தப் படத்துக்காவது, இந்த அளவு பாக்ஸ் ஆபீஸ் நிலவரச் செய்திகள் வந்திருக்குமா என்பதே சந்தேகம்தான்.

இதுவரை வெளியான எல்லாச் செய்திகளும் சொல்லும் சாரம் ஒன்றுதான்.

அது: “இந்திய பாக்ஸ் ஆபீஸ் வரலாற்றையே புரட்டிப் போட்டுள்ளது எந்திரன்” என்பதே. உண்மைதான். இதில் மிகை எதுவுமில்லை.

இந்தியில் ‘ஆல்டைம் பிளாக்பஸ்டர்’ என்று சிகரத்தில் வைக்கப்பட்டிருக்கும் அமீர்கானின் 3 இடியட்ஸ் படத்தின் முதல் வார வசூலை விட கிட்டத்தட்ட இருமடங்கு வசூலித்துள்ளது எந்திரன் / ரோபோ. முதல்வார முடிவில் விநியோகஸ்தர்களின் பங்குத் தொகையாக மட்டும் எந்திரன் ரூ 42 கோடியைக் குவித்துள்ளது. சல்மான்கானின் தபாங் ரூ 30 கோடியையும், அமீர்கானின் 3 இடியட்ஸ் 21.5 கோடியையும் மட்டுமே தந்துள்ளன.

எந்திரன் தந்துள்ள விநியோகஸ்தர் பங்கில் ரூ 25 கோடி தமிழ்ப் பதிப்பு மூலம் கிடைத்தது (விநியோகஸ்தர்கள் பங்கு என்பது, தியேட்டர் வாடகை, கேளிக்கை வரிகள் போக விநியோகஸ்தர்களுக்குக் கிடைக்கும் தொகை. தமிழகத்தில் கேளிக்கை வரி இல்லாவிட்டாலும், பிற மாநிலங்களில் 35 முதல் 60 சதவீதம் வரை அதிக அளவு கேளிக்கை வரி விதிக்கப்படுகிறது) குறிப்பிடத்தக்கது.

டிக்கெட் விற்பனை மூலம்…

டிக்கெட் விற்பனை மூலம் கிடைத்த வசூல் என்று பார்த்தால், முதல் 7 நாட்களில் எந்திரன் ரூ 117 கோடி வரை வசூலித்துள்ளதாக அதிகாரப்பூர்வமாக அறிவிக்கப்பட்டுள்ளது. இது கணக்கேடுகளில் காட்டப்படும் தொகைதான். உண்மையில் இதைவிட மூன்று மடங்கு வசூல் இருக்கும் என்கிறார்கள் நமக்கு நெருங்கிய விநியோகஸ்தர்கள்.

சரி, இந்த அதிகாரப்பூர்வ புள்ளி விவரங்களை வைத்துப் பார்த்தாலும் டிக்கெட் விற்பனை வசூலிலும் எந்திரன் / ரோபோவே முதலிடம் பெறுகிறது. இந்த வகையில் தபாங்க் ரூ 82 கோடியையும், 3 இடியட்ஸ் ரூ 100 கோடியையும் வசூலித்ததாகக் குறிப்பிடுகிறார் மும்பை விநியோகஸ்தர் கோமல். அதிலும் இந்த இரு இந்திப் படங்களும் இரு வாரங்களில் வசூலித்த தொகை இது. ஆனால் ரஜினியின் எந்திரன் / ரோபோ ஒரே வாரத்தில் இதைவிட பல கோடி அதிகம் ஈட்டியுள்ளது.

இப்போதைக்கு ஒட்டுமொத்த வசூலில் இந்தியாவில் முதலிடத்தில் இருப்பது அமீர்கானின் 3 இடியட்ஸ்தான். கடந்த ஆண்டு டிசம்பரில் வெளியான இந்தப் படம் மொத்தம் ரூ 260 கோடி வரை ஈட்டியிருந்தது. மூன்றாவது வார வசூல் நிலவரம் வெளியாகும் போது, 3 இடியட்ஸின் சாதனையை எந்திரன் எளிதில் தாண்டிவிடும் என்கிறார்கள் விநியோகஸ்தர்கள்.

ஒரு மகாராஜாவைப் போல…

இந்திய சினிமா பாக்ஸ் ஆபீஸில் ஒரு மகாராஜாவைப் போல கம்பீரமாக வீற்றிருக்கிறது எந்திரன் என்பதை புள்ளிவிவரங்களுடன் வெளியிட்டுள்ளது டைம்ஸ் ஆப் இந்தியா நாளிதழ்.

பிரபல விநியோகஸ்தர் போரா கூறுகையில், “அமீர்கானின் 3 இடியட்ஸ், சல்மான் கானின் தபாங் இரு படங்களின் வசூலையுமே ரஜினியின் எந்திரன் / ரோபோ எளிதாக தாண்டிவிடும்”, என்றார்.

இந்தியில் மட்டுமே ரோபோ ரூ 30 கோடியை (gross) வசூலித்துள்ளதாக அறிவிக்கப்பட்டுள்ளது. ஒரு டப்பிங் படமான எந்திரனின் சாதனை மலைக்க வைப்பதாக கூறுகிறார் மற்றொரு விநியோகஸ்தர் சுனில் வாத்வா. மீரட், காஸ்யாபாத், ஜோத்பூர், குஜராத் நகரங்களில் இந்த இரண்டாவது வாரமும் திருப்தியான வசூலுடன் ரோபோ ஓடுவதாக வாத்வா கூறுகிறார்.

ஆந்திரத்தில் தொடரும் சாதனை!

ஆந்திர சினிமா இதுவரை பார்த்திராத வசூல் சாதனையை எந்திரன் நிகழ்த்தி வருகிறது என்றால் அது மிகவும் சம்பிரதாயமான வார்த்தையாகிவிடும். அந்த அளவு மிகுந்த வரவேற்புடன் ஓடுகிறது ரோபோவும் எந்திரனும்!

ஹைதராபாத் நகரில் மட்டும் 40 திரையரங்குளில் சராசரியாக 93 சதவிகித பார்வையாளர்களுடன் ஓடிக் கொண்டிருக்கும் ரோபோ, முதல்வார முடிவில், தெலுங்கில் பெரிய ஹிட்டான ராம்சரண் தேஜாவின் மகாதீரா வசூலை ‘ஜஸ்ட் லைக்தட்’ முந்தியுள்ளது. தெலுங்கில் இதுவரை ரூ 20 கோடிவரை குவித்துள்ள ரோபோவுக்கு, புதன் கிழமை வரை மல்டிப்ளெக்ஸ்களில் டிக்கெட் இல்லை என்பதே ஆந்திரா தரும் இன்ப அதிர்ச்சி.

கேரளாவில் ரூ 4 கோடி!

உண்மையிலேயே பெரும் நிம்மதிப் பெருமூச்சு விடுகிறது கேரள திரையுலகம். காரணம் இந்த ஆண்டு முழுவதும் அங்கே காட்டப்பட்டது நஷ்டக் கணக்குதான். ஓரிரு படங்கள் தப்பிப் பிழைத்தன. இந்த நிலையிலிருந்து மலையாளம் சினிமாவைக் காக்கவே வேறு மொழிப் படங்களை இரண்டு வாரம் கழித்து ரிலீஸ் பண்ண வேண்டும் என்று விநியோகஸ்தர்கள் கட்டுப்பாடு வி்தித்தனர்.

ஆனால் இந்தத் தடை இப்போது இல்லை. அக்டோபர் 1-ம் தேதி 128 திரையரங்குகளில் வெளியான எந்திரன், கடந்த 7 நாட்களில் மட்டும் ரூ 4.32 கோடியை வசூலித்துள்ளது. மலையாளத்தின் பெரிய நடிகர்கள் கனவிலும் நினைத்திருக்க முடியாத ஓபனிங் வசூல் இது. இன்னும் அதிக பார்வையாளர்களுடன் ஓடிக் கொண்டிருக்கிறது எந்திரன்.

பெரும் நஷ்டத்தில் தவித்த மலையாள சினிமாவுக்கு நிம்மதியைத் தந்துள்ளது எந்திரன் வசூல் என்கிறார்கள்.

“கேரள சினிமாவில் இதுவரை அதிகபட்ச ஆரம்ப வார வசூல் என்றால் மோகன்லால் நடித்த ஷிகார் படத்துக்குதான் கிடைத்தது. அதுவும் ரூ 91 லட்சம். ஆனால் ரஜினியின் எந்திரன் ரூ 4 கோடியைக் குவித்துவிட்டது. இந்த சாதனையை அடுத்த பல ஆண்டுகளுக்கு வேறு எந்த மலையாளப் படமும் ஹீரோவும் நினைத்துக் கூடப் பார்க்க முடியாது”, என்கிறார் கேரள தயாரிப்பாளர் சங்கத் தலைவர் சாபு செரியன்.

பெங்களூரில் எந்திரனில் பெரும் வசூல் பார்த்த தியேட்டர்காரர்களை, மாநில வணிக வரித்துறையினர் ரெய்ட் அடித்திருக்கிறார்கள் என்றால், அங்கு எந்த அளவு அதிக வருவாய் கிடைத்திருக்கும் என்பதை யோசிக்க வேண்டும்!

வெளிநாடுகளில் எந்திரன் / ரோபோ 350 அரங்குகளில் திரையிடப்பட்டது. அதிகபட்சமாக அமெரிக்காவில் 136 அரங்குகளில் வெளியான இந்தப் படம், மூன்றே நாளில் கிட்டத்தட்ட 3 மில்லியன் டாலர்களை ஈட்டியிருந்தது. இந்த வார முடிவில் அது 5 மில்லியன் டாலர்களாக உயரும் என்கிறார்கள். மலேசியாவில் முதல் மூன்று நாட்களில் 1 மில்லியன் டாலருக்கும் அதிகமாக வசூலானது. இன்னும் பல நாடுகளின் எந்திரன் வசூல் விவரங்கள் இன்று இரவுக்குள் தெரிந்துவிடும்!