சென்னை சவுகார்பேட்டையில் பயங்கரம்: தொழில் அதிபர் சுட்டுக்கொலை

by **நேசமுடன் ஹாசிம்** Tue 2 Aug 2011 - 14:56

சென்னை சவுகார்பேட்டை திருப்பள்ளிதெரு, வெங்கடமேஸ்திரி லேனை சேர்ந்தவர் சுதிர்குமார் சர்மா (வயது52). வட மாநிலத்தைச் சேர்ந்த தொழில் அதிபரான இவர் இங்கு குடும்பத்துடன் தங்கி எலக்ட்ரிகல் கடை நடத்தி வந்தார். இவரது மனைவி மம்தா.

இவர்களுக்கு மேகா என்ற பட்டதாரி மகளும், பிரசாந்த் என்ற மகனும் உள்ளனர். மம்தாவின் அண்ணன் மகன் ஆசிஷ் சர்மா (22) உத்தரபிரதேச மாநிலம் மதுராவில் வசிக்கிறார். பூஜை மற்றும் கலைப்பொருட்கள் விற்பனை செய்து வருகிறார். வியாபார விஷயமாக அடிக்கடி இவர் சென்னை வந்து செல்வார். அப்போது இவருக்கு சுதிர்குமார் சர்மா ரூ.8 லட்சம் கடன் கொடுத்து இருந்தார்.

அதை திரும்ப கேட்டதால் இருவருக்கும் தகராறு ஏற்பட்டது. இந்த நிலையில் கலைப்பொருட்கள் விற்பனை செய்வதற்காக ஆசிஷ்சர்மா தனது மனைவியுடன் சென்னை வந்திருந்தார். சவுகார்பேட்டையில் பெருமாள் முதலிதெருவில் வட மாநிலத்தவர் தங்கும் விடுதியில் முதல் மாடியில் 22-ம் எண் அறையில் தங்கி இருந்தார்.

இதை அறிந்த சுதிர்குமார் கொடுத்த கடனை திரும்ப கேட்டதற்காக நேற்று இரவு 11.30 மணி அளவில் தங்கும் விடுதிக்கு வந்தார். அப்போது ஆசிஷ் சர்மாவின் மனைவி சமையல் செய்வதற்காக மொட்டை மாடிக்கு சென்றிருந்தார். ஆசிஷ் சர்மா மட்டும் அறையில் இருந்தார். அவரிடம் சுதிர்குமார் கடனை திருப்பி கேட்டபோது இருவருக்கும் வாக்குவாதம் ஏற்பட்டது. ஆத்திரம் அடைந்த ஆசிஷ்சர்மா தான் வைத்திருந்த துப்பாக்கியால் சுதிர்குமார் தலையில் சுட்டார்.

இதில் அவரது நெற்றியில் குண்டு பாய்ந்து மற்றொருபுறம் வெளியே வந்தது. உட்கார்ந்த நிலையில் ரத்த வெள்ளத்தில் சுதிர்குமார் அதே இடத்தில் பலியானார். உடனே ஆசிஷ்சர்மா தப்பி ஓடுவதற்காக வெளியே வந்தார். இந்த சமயத்தில் துப்பாக்கி வெடிக்கும் சத்தம் கேட்டு விடுதியின் 2-வது மாடியில் இருந்த காவலாளி மல்லையா ஓடி வந்தார்.

சுதிர்குமார் கொலை செய்யப்பட்டுக் கிடப்பதை பார்த்து அதிர்ச்சி அடைந்தார். தப்பி ஓட முயன்ற ஆசிஷ்சர்மாவை அறையில் தள்ளி பூட்டி போலீசுக்கு தகவல் கொடுத்தார். போலீஸ் கமிஷனர் திரிபாதி உத்தரவின்பேரில் வடசென்னை இணை கமிஷனர் செந்தாமரைக் கண்ணன், பூக்கடை துணை கமிஷனர் அன்பு, உதவிகமிஷனர் குமார், யானைக்கவுனி இன்ஸ்பெக்டர் சுந்தரம் ஆகியோர் சம்பவ இடத்துக்கு விரைந்து வந்தனர்.

அறையில் பூட்டி வைக்கப்பட்டிருந்த ஆசிஷ் சர்மாவிடம் விசாரணை நடத்தி கைது செய்தனர். அங்கு அலமாரியில் இருந்த கைத்துப்பாக்கியை கைப்பற்றினர். அது 7.62 எம்.எம்.பிஸ்டல் ஆகும். கொலையாளியை அறையில் தள்ளி பூட்டிய காவலாளி, அவரது மனைவி லட்சுமி, மகள் பத்மா ஆகியோரிடம் நடந்த சம்பவம் பற்றி போலீசார் விசாரணை நடத்தினார்கள்.

கொலை நடந்த தங்கும் விடுதியின் கீழ் தளத்தில் ஏராளமான கடைகள் உள்ளன. முதல் மாடியிலும், 2-வது மாடியிலும் தனித்தனி அறைகளும், அமர்ந்து சாப்பிடுவதற்கு வசதியாக பெரிய ஹாலும் உள்ளது. காலை முதல் இரவு 11 மணி வரை எப்போதும் மக்கள் நடமாட்டம் இருக்கும்.

அதன் பிறகு ஆள் நடமாட்டம் இல்லாத நேரத்தில் இந்த கொலை நடந்துள்ளது. கைதான கொலையாளியை போலீஸ் நிலையத்துக்கு அழைத்துச் சென்று விசாரித்து வருகிறார்கள். சுட்டு கொல்லப்பட்ட சுதிர்குமார் சர்மாவின் மகள் மேகாவுக்கு திருமண ஏற்பாடு நடந்து வந்தது. திருமண செலவுக்கு பணம் தேவைப்படுவதால்தான் கொடுத்திருந்த கடனை திருப்பி கேட்டபோது தகராறு ஏற்பட்டு சுதிர்குமார் சுட்டுக்கொல்லப்பட்டார்.

கொலை நடந்த விடுதியில் வடமாநிலத்தவர் மட்டுமே தங்குவார்கள். மற்ற இடங்களில் தங்குவதற்கு அதிக வாடகை என்பதால் இங்கு குறைந்த வாடகையில் அறைகள் கொடுக்கப்படும். இதனால் வட மாநிலத்தவர்கள் சென்னை வரும்போது இந்த தர்மசாலா என்ற விடுதியில்தான் தங்குவது வழக்கம். அவர்கள் மாடியில் தனியாக ஸ்டவ் வைத்து அவர்களே சமைத்து சாப்பிடுவார்கள். ஓட்டலில் சாப்பிடுவது கிடையாது.