ஆந்திர முன்னாள் முதல்-மந்திரி ரோசையா தமிழக கவர்னர் ஆகிறார் : விரைவில் அறிவிப்பு வெளியாகும்

சென்னை, ஆக.11:-

தமிழக
கவர்னர் சுர்ஜித்சிங் பர்னாலாவின் பதவிக்காலம் சமீபத்தில் முடிவடைந்தது.
என்றாலும் புதிய கவர்னர் நியமிக்கப்படாததால் அவர் கவர்னர் பதவியில்
நீடித்து வருகிறார்.

கடந்த 2004-ம் ஆண்டு நவம்பர்
மாதம் 3-ந் தேதி பதவி ஏற்ற சுர்ஜித் சிங் பர்னாலா, கடந்த 6.5
ஆண்டுகளுக்கும் மேலாக கவர்னராக இருந்து வருகிறார் என்பது
குறிப்பிடத்தக்கது.

தமிழ்நாட்டில் நீண்ட நாட்களாக
கவர்னர் பதவியில் இருப்பவர் என்ற சிறப்பு பெற்றுள்ள பர்னாலாவுக்கு தற்போது
86 வயதாகி விட்டதால் அவருக்கு பதவி நீட்டிப்பு கொடுக்கப்படவில்லை. அவருக்கு
பதில் புதிய கவர்னர் பதவிக்கு மார்க்கரெட் ஆல்வா உள்பட சிலரது பெயர்கள்
கூறப்பட்டன.

இந்த நிலையில் தமிழக கவர்னராக ஆந்திர
பிரதேச முன்னாள் முதல்-மந்திரி ரோசையா நியமிக்கப்படலாம் என்று
தெரியவந்துள்ளது. அவரது நியமனத்துக்கு அனைத்துத் தரப்பிலும் ஒருமித்த
கருத்து ஏற்பட்டு உள்ளதாக மத்திய உள்துறை அமைச்சக உயர் அதிகாரி ஒருவர்
கூறினார்.

தமிழக கவர்னராக நியமிக்கப்படலாம் என்று
எதிர்பார்க்கப்பட்ட உத்தரகாண்ட் மாநில கவர்னர் மார்க்கரெட் ஆல்வா ராஜஸ்தான்
மாநில கவர்னராக நியமிக்கப்பட உள்ளார். ராஜஸ்தான் மாநிலத்தில் கவர்னராக
இருந்த பிரபாராவ் மரணம் அடைந்ததைத் தொடர்ந்து அந்த பதவிக்கு இன்னமும்
நிரப்பப்படாமலே உள்ளது.

டெல்லி கவர்னர் தெஜிந்தர்
கன்னா, பஞ்சாப் கவர்னர் சிவராஜ் பாட்டீல் ஆகியோரும் மாற்றப்படலாம் என்று
முதலில் கூறப்பட்டது. ஆனால் அவர்கள் மாற்றப்பட மாட்டார்கள் என்று
தெரிகிறது.

மத்திய பிரதேச கவர்னர் ரமேஷ்வர்
தாக்கூர், கோவா கவர்னர் ஆகியோரது பதவிக் காலமும் முடிந்து விட்டது. இந்த
மாநிலங்களிலும் புதிய கவர்னர்கள் நியமிக்க வேண்டியதுள்ளது. ஜார்க்கண்ட்
மாநிலத்துக்கும் புதிய கவர்னர் நியமிக்க வேண்டியதுள்ளது.

இதனால்
கவர்னர்கள் நியமனம் மற்றும் கவர்னர்கள் மாற்றம் எதிர்பார்ப்பை ஏற்படுத்தி
உள்ளது. கவர்னர் பதவிக்கு வடகிழக்கு மாநிலங்களைச் சேர்ந்தவர்களுக்கு
முன்னுரிமை கொடுக்கப்படும் என்று கூறப்படுகிறது. புதிய கவர்னர்கள் பற்றிய
அறிவிப்பை மத்திய அரசு விரைவில் வெளியிட உள்ளது.

மாலை மலர்

:”@: