தலைமையகம் முன் ஆர்ப்பாட்டம் நடத்தத் தடை

தலைமையகம் முன் ஆர்ப்பாட்டம் நடத்தத் தடை
ஐ.தே.க. தலைமையகமான சிறிகொத்தாவுக்கு முன்பாக சத்தியாக் கிரகம் நடத்துவதற்கு ஐ.தே.க. பிரதித் தலைவர் சஜித் பிரேமதாச அடங்களான மாற்றுக் குழுவினருக்கு நுகேகொடை நீதவான் நீதிமன்றம் நேற்று தடை உத்தரவு விதித்தது.

ஐ.தே.க. செயற்குழுக் கூட்டத்திற்கு இடைஞ்சலாக அமைதிக்கு குந்தகம் ஏற்படும் வகையில் மேற்படி சத்தியாக்கிரகம் நடைபெற உள்ளதாக கூறி மிரிஹான பொலிஸார் மனுத்தாக்கல் செய்தனர். இதன் அடிப்படையிலேயே இந்த தடை உத்தரவு விதிக்கப்பட்டது.

ஐ.தே.க. தலைவர் ரணில் விக்கிரமசிங்க அடங்கலான செயற்குழு உறுப்பினர்களின் உயிர்களுக்கு அச்சுறுத்தல் ஏற்படலாம் என பொலிஸார் நீதிமன்றத்திற்கு அறிவித்தனர். இந்த ஆர்ப்பாட்டத்தினால் பொதுமக்களுக்கு இடையூறு ஏற்படலாம் எனவும் பொலிஸார் சுட்டிக்காட்டியிருந்தனர்.

இது குறித்து ஆராய்ந்த நுகேகொடை நீதவான் அனுர குமார ஹேரத் சத்தியா கிரகம் நடத்த தடை உத்தரவு விதித்தார்.

ஐ.தே.க. தவிசாளர்

இதேவேளை, விகாரமகா தேவி பூங்காவில் நடைபெற்ற ஆர்ப்பாட்டம் குறித்து கருத்துத் தெரிவித்த ஐ.தே.க. தவிசாளர் காமினி ஜயவிக்கிரம பெரேரா, ஐ.தே.க. ஏற்பாடு செய்திருந்த எந்த ஒரு ஆர்ப்பாட்டமோ சத்தியாக் கிரகமோ நேற்று நடைபெறவில்லை என்றார். விகாரமகாதேவி பூங்காவிலோ வேறு இடத்திலோ நடத்தப்பட்ட ஆர்ப்பாட்டத்திற்கும் ஐ.தே.க.வுக்கும் எதுவித தொடர்பும் கிடையாது என்றும் அவர் குறிப்பிட்டார்.