சுதந்திர தின கலை நிகழ்ச்சிக்கு மொட்டை போட்ட மாணவன்

சென்னை:சினிமாவுக்கு இணையாக, கலை நிகழ்ச்சிகளை உருவாக்குவதில் பள்ளி ஆசிரியர்கள் திறமை வாய்ந்தவர்களாக மாறி வருகின்றனர். பள்ளி விழாக்களுக்காக குழந்தைகளை பாடாய்படுத்துகின்றனர் என பெற்றோர் குறைசொல்வது குறைந்து போய், தற்போது பெற்றோரும் தங்கள் குழந்தைகள் சிறப்பாக பங்கெடுக்க அதிக அக்கறை எடுத்து வருகின்றனர்.சென்னை மாநகராட்சியில் நேற்று நடந்த சுதந்திர தின விழா கலை நிகழ்ச்சி அதில் ஒரு சான்று. புலியூர் மாநகராட்சி பள்ளியில், சுதந்திர தின விழா கலை நிகழ்ச்சிக்காக, ஆசிரியர்களும், மாணவர்களும் மிகுந்த அர்ப்பணிப்போடு செயல்பட்டிருந்தனர்.
கடந்த 10 ஆண்டுகளாக, சுதந்திர தின விழா கலை நிகழ்ச்சிக்கு, இந்த பள்ளி ஆசிரியர்களே பாட்டு எழுதி, இசை அமைக்கின்றனர். இந்த முறை, ஆசிரியர்கள் எழுதிய பாட்டுக்கு, இசை அமைப்பாளர் ஏ.ஆர்.ரகுமான் குழுவை சார்ந்த நூர்ஜகான், இசை அமைத்து கொடுத்துள்ளார். சினிமா பாடல்களுக்கு இணையாக, கேட்பவர்களை மெட்டுப் போட வைக்கும் அளவுக்கு பாடல் உருவாக்கப்பட்டுள்ளது.இந்தப் பாடலின் நடனத்தின் இடையே, மாணவன் ஒருவன் மகாத்மா காந்தி வேடத்தில் காட்சியளிக்கிறார். காந்தியாக ஒப்பனை செய்வதற்காக, பள்ளி மாணவன் உயகேஷ்வரன் மொட்டை அடித்துள்ளான். ஒரு வாரத்துக்கு முன்னால் மொட்டை அடித்தால் முடி வந்துவிடும் என்பதால், ஒரு நாளுக்கு முன் மொட்டை அடித்து, "மொழு, மொழு' தலையுடன் அவன் இருந்தது, பார்வையாளர்களை மெய்சிலிர்க்க வைத்தது."ஆடுவோமே பள்ளு பாடுவோமே' பாட்டுக்கு அயனாவரம் மாநகராட்சிப் பள்ளி மாணவியர் இருவர் கரகம் ஆடினர். நிஜத்தில், கரகாட்ட கலைஞர்கள் போலவே, ஆடிய அம்மாணவியர், கரகத்துடன் தரையில் இருந்த கைகுட்டையை எடுத்து பார்வையாளர்களின் கைதட்டலைப் பெற்றனர்.மாநகராட்சியின் சூளை நடுநிலைப் பள்ளியின் மழலையர் வகுப்பு சிறுவர், சிறுமிகள் "ஓடி விளையாடு பாப்பா' பாட்டுக்கு நடனமாடி அனைவரின் நெஞ்சத்திலும் இடம் பெற்றனர்.
கலை நிகழ்ச்சிக்காக, சிறுவர்களை தயார் செய்வது பற்றி, சூளை பள்ளி ஆசிரியர் கீதா கூறும்போது, "சொல்லிக் கொடுப்பதை அப்படியே பிடித்துக் கொள்ளும் பிஞ்சுகளை, தயார் செய்வது ஆர்வமாக இருக்கும். கலை நிகழ்ச்சியில் ஆடப் போகிறேன் என்ற ஆர்வத்தில், வீட்டில் ஆடிக்கொண்டே இருப்பான். அதுவும், நடனத்துக்கான ஆடையை போட்டுக் கொள்வதில், அவர்களுக்கு இருக்கும் மகிழ்ச்சியே அலாதியானது' என்கிறார்.
சுதந்திரதினம், குடியரசு தினம் போன்ற விழாக்களில் கலை நிகழ்ச்சிகளில் பங்கேற்கும் மாணவர்களுக்கான, உடையை தயார் செய்வது, சிகை அலங்காரம் செய்வது, பாவனைகளில் புதுமையை சேர்ப்பது என, சினிமாவுக்கு இணையாக தங்களை தயார் செய்து கொள்கின்றனர்.கலை நிகழ்ச்சியை தயார் செய்வது அர்ப்பணிப்போடு இருப்பது ஒரு புறம். அதை அரங்கேற்றுவதற்காக, குழந்தைகளை அதிகாலையிலேயே எழுப்பி, உடைகளை உடுத்தி, கலை நிகழ்ச்சி முடியும் வரை அது கலையாமல் பார்த்துக் கொண்டு, வீடு சேர்ப்பது, சினிமா குழு வெளியூர் படப்பிடிப்புக்கு சென்று வருவதற்கு சமமானது.
இதற்கெல்லாம், சினிமா டைட்டிலில் போடுவது போல இயக்குனர், பாடல் ஆசிரியர், நடன இயக்குனர், இசை அமைப்பாளர் போல ஆசிரியர்களும், மாணவர்களும் தங்களை மாற்றிக் கொள்வதால் கிடைக்கும் மன நிறைவே காரணம் என்கின்றார் ஆசிரியர் ஒருவர்.எஸ். திருநாவுக்கரசு

இந்த அழகிய நிகழ்ச்சியை பார்க்க கிடைக்கலயே