கடாபி ஆதரவுப் படை வசமுள்ள பானி வலீத் நகர் கிளர்ச்சியாளர்களால் முற்றுகை

கடாபி ஆதரவுப் படை வசமுள்ள பானி வலீத்
நகர் கிளர்ச்சியாளர்களால் முற்றுகை



இரு தரப்பு பேச்சுவார்த்தையும் தோல்வி

கடாபி ஆதரவுப் படை வசமுள்ள பானி வலீத் பகுதியை சுமுகமாக கைமாற்றுவது குறித்த
பேச்சுவார்த்தை தோல்வியடைந்ததாக கிளர்ச்சிப் படை குறிப்பிட்டுள்ளது. எனினும் பானி
வலீத் நகரை மூன்று திசைகளில் இருந்தும் எதிர்ப்பாளர்கள் முற்றுகையிட்டுள்ளனர்.
லிபியா தலைநகர் திரிபோலியில் இருந்து தென்கிழக்கில் 150 கி.மீ. தொலைவில் அமைந்துள்ள
பானி வலீத் நகரில், ‘வர்பாலா’ என்ற பழங்குடியினர் அதிகளவில் உள்ளனர்.

லிபியாவில்
உள்ள 100க்கும் மேற்பட்ட பழங்குடியினங்களில், ‘வர்பாலா’ இனம் தான் தொகையில் பெரியது.
இந்நகரின் மூன்று புறங்களில் இருந்தும் நகருக்குச் செல்லும் வழிகளை நேற்று முன்தினம்
கிளர்ச்சியாளர்கள் அடைத்தனர். இதனால் பானி வலீத்துக்கும் வெளியுலகுக்குமான தொடர்பு
துண்டிக்கப்பட்டுள்ளது.
இந்நிலையில் பானி வலீத் நகரில் உள்ள கடாபி ஆதரவாளர்கள் சரணடைவது குறித்து கடந்த ஒரு
சில தினங்களாக இடம்பெற்ற பேச்சுவார்த்தை தோல்வியடைந்ததாக கிளர்ச்சிப் படையின்
பேச்சாளர் ஒருவர் குறிப்பிட்டுள்ளார். கிளர்ச்சியாளர்கள் பானி வலீதுக்குள் நிராயுத
பாணியாக நுழையும்படி கடாபி ஆதரவாளர்கள் கோரிக்கை விடுத்துள்ளார்.

இதற்கு
கிளர்ச்சியாளர்கள் மறுப்பு தெரிவித்துள்ளதைத் தொடர்ந்து இரு தரப்புக்கும் இடையிலான
பேச்சுவார்த்தை முறிவடைந்துள்ளது.
இந்நிலையில் பானி வலீதை கைப்பற்றும் விவகாரம் தற்போது கிளர்ச்சிப் படையின் இராணுவ
தளபதிகளிடம் ஒப்படைக்கப்பட்டுள்ளதாக மேற்படி பேச்சாளர் பி. பி. சி. செய்திச்
சேவைக்கு தெரிவித்துள்ளார்.
இந்நிலையில் பானி வலீத் பகுதியிலுள்ள பொதுமக்களை கடாபி ஆதரவுப் படை மனித கேடயங்களாக
பயன்படுத்தும் அபாயம் இருப்பதாக கிளர்ச்சியாளர்கள் அச்சம் தெரிவித்துள்ளனர்.
கடாபி ஆதரவுப் படையின் கைவசமுள்ள முக்கிய நகர்களில் ஒன்றான பானி வலீத்தில் முஅம்மர்
கடாபி தங்கி இருக்கலாம் என கிளர்ச்சியாளர்கள் சந்தேகம் எழுப்பி வருகின்றனர். எனினும்
முஅம்மர் கடாபியின் மகன் சயில் அல் இஸ்லாம் இங்கிருந்து கடந்த சனிக்கிழமை
வெளியேறியுள்ளதாக செய்திகள் தெரிவிக்கின்றன.
அதேபோன்று முஅம்மர் கடாபியின் மற்றுமொரு மகன் சாதி கடாபி பானி வலீதிக்கு புறநகரில்
தங்கி இருப்பதாக சி. சி. என். தொலைக்காட்சிக்கு தெரிவித்துள்ளார். அத்துடன்
கிளர்ச்சியாளர்களுடனான சமாதான பேச்சுவார்த்தையை தனது சகோதரர் சயிப் அல் இஸ்லாம்
குழப்பிவிட்டதாகவும் குறிப்பிட்டுள்ளார்.
சாதி கடாபி கிளர்ச்சியாளர்களிடம் சரணடைவது குறித்து பேச்சுவார்த்தை நடத்திய
பின்னர்அவரது சகோதரர் சயிப் அல் இஸ்லாம் தொடர்ந்தும் போராடுவதாக அறிவித்திருந்தமை
குறிப்பிடத்தக்கது.
லிபியாவின் பெரும்பாலான பகுதியை கிளர்ச்சியாளர்கள் கைப்பற்றியுள்ள நிலையில் கடாபி
ஆதரவாளர்கள் வசம் மேலும் நான்கு நகர்கள் எஞ்சியுள்ளன. பானி வலீதுடன் கடாபி
பிறந்தகமான சிர்த், ஜுப்ரா, சபா ஆகிய நகர்களே கடாபி ஆதரவாளர்களின் வசமுள்ளது.
எனினும் இந்த பகுதிகளை அண்டி கிளர்ச்சியாளர்கள் ஆயுதங்களுடன் தரித்து நிற்கின்றனர்.
கடாபி ஆதரவுப் படைகளுக்கான சரணடையும் காலத்தை கிளர்ச்சியாளர்கள் ஒரு வாரத்திற்கு
நீடித்துள்ளது. இந்த காலக்கெடு முடிவடைந்ததும் மேற்படி நகரங்களை கைப்பற்ற
கிளர்ச்சியாளர்கள் திட்டமிட்டுள்ளனர் என தெரிகிறது.