அரசு கேபிள் டிவியில் கட்டணச் சேனல்கள் தெரிவது எப்போது

தமிழ்நாடு அரசு "கேபிள் டிவி'யில், கட்டணச் சேனல்கள் தெரிவது எப்போது என்ற ஆவல்,
பொதுமக்கள் மத்தியில் எழுந்துள்ளது.



கடந்த தி.மு.க., ஆட்சியில், "அரசு கேபிள் டிவி' துவங்க வேலூர், கோவை, தஞ்சை, நெல்லை ஆகிய நான்கு மாநகராட்சிகளில் கட்டுப்பாட்டு அறைகள் அமைக்கப்பட்டன. ஆனால், அறிவித்தபடி "கேபிள் டிவி' சேவை துவக்காமல், கிடப்பில் போடப்பட்டது.அ.தி.மு.க., ஆட்சி அமைந்ததும், "அரசு கேபிள் டிவி'யைத் துவக்குவதில் மும்முரம் காட்டி, கடந்த 2ம் தேதி முதல், தமிழ்நாடு அரசு, "கேபிள் டிவி' நிறுவன சேவையை துவக்கி உள்ளது.
"அரசு கேபிள் டிவி' நிறுவனம், 70 ரூபாய்க்கு 90 இலவச சேனல்கள் வழங்குகிறது, ஆனால், இதில் கட்டணச் சேனல்களான சன், விஜய், ராஜ் உள்ளிட்ட பல சேனல்கள் தெரியவில்லை. இது தவிர, "கேபிள் டிவி' ஆபரேட்டர்களும் அரசு நிர்ணயித்த கட்டணம், தங்களுக்கு கட்டுப்படியாகவில்லை; அரசு மறு பரிசீலனை செய்ய வேண்டும் என, புலம்பி வருகின்றனர்."அரசு கேபிள் டிவி'யில் உள்ள குறைகளை பயன்படுத்திக் கொள்ளும் வகையில், டி.டி.எச்., நிறுவனங்கள், தங்கள் விற்பனையை அதிகரிக்க பல வியூகங்களை வகுத்து வருகின்றன. இதற்கு தீர்வு காண வேண்டுமென எம்.எஸ்.ஓ., மற்றும் "கேபிள் டிவி ஆபரேட்டர்கள்' வலியுறுத்தியுள்ளனர்.


சென்னையிலுள்ள எம்.எஸ்.ஓ., நிர்வாகி ஒருவர் கூறும் போது,"அரசு கேபிள் டிவி' மக்களிடம் வரவேற்பை பெற்றுள்ளது. தமிழகத்தில் பல விதமான பார்வையாளர்கள் உள்ளனர். அவர்களின் ரசனைக்கேற்ப சேனல்களை வழங்க வேண்டும். "அரசு கேபிள் டிவி'யில் இலவச சேனல்கள் மட்டுமே தெரிகிறது. கட்டணச் சேனல்கள் தெரிய அரசு நடவடிக்கை எடுக்க வேண்டும். கட்டணத்தை மறுபரிசீலனை செய்து, ஆபரேட்டர்களுக்கு கிடைக்கும் தொகையையும் உயர்த்த வேண்டும்' என்றார்.


திருவண்ணாமலையைச் சேர்ந்த, "கேபிள் டிவி' ஆபரேட்டர் கூறும் போது,
"அரசு கேபிள் டிவி' தொடர்ந்து செயல்பட, "கேபிள் டிவி' ஆபரேட்டர்கள் ஒத்துழைக்க வேண்டும். அரசும், அனைத்து சேனல்களையும் ஒளிபரப்ப நடவடிக்கை எடுக்க வேண்டும். பல இடங்களில், அரசு ஒளிபரப்பும் 90 சேனல்களும் தெரிவதில்லை. 40 முதல் 60 சேனல்கள் மட்டும் தெரிகின்றன. இதற்கு தரம் குறைந்த, "மாடுலேட்டர்'கள் மற்றும் இதர உபகரணங்கள் காரணமாக உள்ளன. சேனல்களும் தெளிவாக தெரிவதில்லை. இந்த குறைகளையும் அரசு உடனே சரி செய்ய வேண்டும் என்றார்.