புலிகளுக்கு முதல்வர்தான் பெயர் சூட்டவேண்டும் , காத்திருக்கிறது ஒரு தரப்பு!

வண்டலூர் உயிரியல் பூங்காவில் மொத்தம் 15 புலிகள் உள்ளன. இதில் வெள்ளப்புலி மட்டும் 7. விலங்குகள் பரிமாற்ற திட்டத்தின் கீழ் டெல்லி உயிரியல் பூங்காவில் இருந்து 2006 அடோபர் 1ம் தேதி அனு (வயது 7), பீஷ்மர் என்ற ஜோடி வெள்ளிப் புலிகள் வண்டலூர் பூங்காவுக்கு கொண்டு வரப்பட்டன. மார்ச் 2009ல் பீஸ்மர் மூலம் அனு 2 குட்டி போட்டது. அந்த குட்டிகளுக்கு ஆகாஷ், நர்மதா என்று பெயர் சூட்டப்பட்டது.

பின்னர், 2010 ஜூன் 6ம் தேதி மீண்டும் அனு ஒரு ஆண், 2 பெண் குட்டிகளை ஈன்றது. இந்த குட்டிகளுக்கு செம்பியன், இந்திரா, வள்ளி என அப்போதைய முதல்வர் கருணாநிதி பெயர் சூட்டினார். மீண்டும், 2011 ஆகஸ்ட் 5ம் தேதி அனு ஒரு ஆண் மற்றும் 2 பெண் குட்டிகளை ஈன்றது. இந்த குட்டிகள் தற்போது நல்ல முறையில் வளர்ந்துள்ளன. தாய்ப் பாலை மட்டுமே குடிக்கின்றன. குட்டிகள் பிறந்து 45 நாட்களுக்கு மேல் ஆகிறது. எனவே, தாய்ப் பால் போதவில்லை. இறைச்சி கொடுக்கும் நேரம் வந்துவிட்டது. குட்டிகளுக்கு பூங்கா ஊழியர்கள் மூலம் இறைச்சி வழங்கப்படும்.



அப்போது, குட்டிகளை பெயர் வைத்து அழைக்க வேண்டும். பெயர் வைத்து அழைத்தே உணவு வழங்கப்படும். இந்த குட்டிகளுக்கு பெயர் வைக்காததால், அவற்றுக்கு இறைச்சி வழங்குவதில் சிக்கல் ஏற்பட்டுள்ளது. குட்டிகளுக்கு தினமும் 250 கிராம் கோழி இறைச்சி வழங்கப்படும். பெயர் வைக்கவிலை என்றால் குட்டியை அழைக்கும்போது முரண்டு பிடிக்கும். எனவே, விரைவில் பெயர் சூட்டு விழா நடத்த வேண்டும் என ஊழியர்கள் கோரிக்கை விடுத்துள்ளனர்.

தற்போது, குட்டிகள் போதிய உணவு இன்றி உடல் நிலை பாதிக்கும் அபாயம் உள்ளது என்று கால்நடை மருத்துவர்கள் தெரிவிக்கின்றனர். தமிழக முதல்வர்தான் பெயர் சூட்ட வேண்டும் என்று பூங்கா நிர்வாகம் காத்திருக்கிறது. இன்னும் முதல்வரிடமிருந்து அனுமதி கிடைக்கவில்லை என தெரிகிறது. இது குறித்து, பூங்கா நிர்வாகத்தை கேட்டபோது மவுனமே அவர்களின் பதிலாக இருந்தது.