தற்கொலை செய்து கொள்வேன் என்று மிரட்டினால், விவாகரத்து கோரலாம்

by **நேசமுடன் ஹாசிம்** Mon 3 Oct 2011 - 17:08

கணவன் அல்லது மனைவிக்கு மனநிலை பாதிக்கப்பட்டிருந்தால் மற்றவர் விவாகரத்து கோரலாம்
என்று உச்ச நீதிமன்றம் தீர்ப்பளித்துள்ளது. பஞ்சாப் மாநிலம் அமிர்தசரசை சேர்ந்தவர் பங்கஜ் மகாஜன். இவருக்கும் டிம்பிள் என்பவருக்கும் கடந்த 2000ம் ஆண்டு திருமணம் நடந்தது. திருமணம் நடந்த ஒன்றரை மாதத்திலேயே, டிம்பிளின் நடவடிக்கைகள் விநோதமாக இருப்பதை மகாஜன் உணர்ந்தார். டிம்பிளுக்கு திடீரென கோபம் வரும். கணவன் மீது சந்தேகப்படுவார். தனிக்குடித்தனம் போகாவிட்டால், ‘என் சாவுக்கு கணவனும், அவரது குடும்பத்தினரும்தான் காரணம்’ என்று எழுதி வைத்துவிட்டு தற்கொலை செய்து கொள்வேன் என்று மிரட்டத் தொடங்கினார்.

பயந்துபோன மகாஜனும் தனிக் குடித்தனத்துக்கு ஒப்புக் கொண்டார். தனிக் குடித்தனம் போன பிறகும் டிம்பிளின் நடத்தையில் மாற்றம் இல்லை. உறவினர்கள், சக ஊழியர்கள் முன்பாக மகாஜனை பல முறை அவமானப்படுத்தி உள்ளார். ஒரு முறை மாடிப்படியில் இருந்து தள்ளிவிட்டதில் மகாஜனின் கையில் எலும்பு முறிவு ஏற்பட்டது. மேலும், மாடியில் இருந்து குதித்து தற்கொலைக்கு முயன்ற டிம்பிளை மகாஜன் காப்பாற்றினார்.

இந்த நிலையில், திருமணத்துக்கு முன்பு மனநோய்க்கு டிம்பிள் சிகிச்சை பெற்றது தெரியவந்தது. இதனால், விவாகரத்து கேட்டு மகாஜன் வழக்கு தொடர்ந்தார். ரோபார் மாவட்ட குடும்ப நல நீதிமன்றம் விவாகரத்து வழங்கியது. ஆனால், டிம்பிளின் மேல் முறையீட்டு மனுவை ஏற்றுக் கொண்ட பஞ்சாப்& அரியானா உயர் நீதிமன்றம் விவாகரத்தை ரத்து செய்துவிட்டது. இதை தொடர்ந்து உச்ச நீதிமன்றத்தில் மகாஜன் மேல் முறையீடு செய்தார். இந்த வழக்கை நீதிபதிகள் சதாசிவம், சவுகான் ஆகியோர் கொண்ட பெஞ்ச் விசாரித்து அளித்த தீர்ப்பில் கூறியுள்ளதாவது:

கணவன், மனைவியில் யாராவது ஒருவருக்கு மனநிலை பாதிக்கப்பட்டிருந்தால் மற்றவர் விவாகரத்து கோரலாம். இந்த வழக்கில், டிம்பிள் மனநோயால் பாதிக்கப்பட்டவர் என்பது நிரூபிக்கப்பட்டுள்ளது. அதற்கான ஆதாரங்களை மகாஜன் தாக்கல் செய்துள்ளார். டாக்டர்களும் இதர சாட்சிகளும் அதை உறுதிபடுத்தி உள்ளனர். இதனால், உயர் நீதிமன்ற தீர்ப்பை ரத்து செய்து செய்து மகாஜனுக்கு விவாகரத்து வழங்குகிறோம். இவ்வாறு நீதிபதிகள் தீர்ப்பில் கூறியுள்ளனர்.