அகில இலங்கை இந்து மாமன்றம் வழங்கும் தைப்பொங்கல் செய்தி

வையகத்தை வாழவைக்கும் தெய்வமாக விளங்கும் சூரிய பகவானை போற்றித் துதித்து வழிபாடு செய்யும் பாரம்பரியமிக்க திருநாளாக தைப்பொங்கல் அமைகிறது. இந்து மக்களின் தனித்துவமிக்க பண்டிகையாக முக்கியத்துவம் பெறும் இந்நாள் தைமாதப் பிறப்பாகவும் தமிழர் திருநாளாகவும் சிறப்பு பெறுகிறது.
“தை பிறந்தால் வழிபிறக்கும்” என்ற பாரம்பரிய சொற்றொடரின்படி பலவித எதிர்பார்ப்புக்களையும், நம்பிக்கைகளையும் வைத்து தைத்திங்கள் வரவேற்கப்படுகிறது. அந்த வகையில் மக்களது வாழ்வில் துன்பங்கள் நீங்கி, இன்பம் மலரும் வகையில் தைத்திங்கள் அமையவேண்டும் என்பதே அனைவரினதும் விருப்பமாகும்.

கடந்த பல வருடங்களாக தமிழ் மக்கள் அனுபவித்து வந்த வேதனைகளும், சோதனைகளும் வார்த்தைகளால் சொல்லமுடியாது. அத்தகைய துரதிர்ஸ்டவசமான நிலைமைகளின் தாக்கம் இன்னமும் முழுமையாக நீங்காத நிலையில், மழை வெள்ளம் போன்ற இயற்கை அனர்த்தங்களால் மேலும் அவர்களுக்கு இன்னல்கள் ஏற்பட்டு வருவது உண்மையிலே வருத்தத்திற்குரியது.

இத்தகைய நிலைமையில் எங்கள் உடன் பிறப்புகளுக்கு உதவவேண்டியது எங்கள் கடமையாகும். கடந்த மூன்று தசாப்த காலங்களுக்கும் மேலாக எங்கள் சகோதர சகோதரிகள் பலவித இன்னல்களை அனுபவித்து வந்தபோது அகில இலங்கை இந்து மாமன்றம் இயன்றவரையிலான நிவாரண உதவிகளை வழங்கி வந்திருப்பதுடன், அவர்களுக்காக மாமன்றத்தின் சார்பாக தயங்காது குரல்கொடுத்தும் வந்திருக்கிறோம்.

இத்தகைய சமூகநலப் பணிகளை இனிவரும் காலங்களிலும் மாமன்றம் தொடர்ந்து முன்னெடுத்துச் செல்லும் என்பதையும் தெரிவித்துக் கொள்கின்றோம். சூரியோதயம் காணும் கிழக்கில் இன்று வெள்ள அனர்த்தங்களினால் மக்கள் வேதனைகளை அனுபவித்துக் கொண்டிருக்கிறார்கள். அவர்களுக்கும் நிவாரணங்களை வழங்கி உதவிக் கொண்டிருக்கிறோம்.

ஆலயங்களும், இந்து நிறுவனங்களும், இந்து மக்களும் தங்களால் இயன்ற வகையில் பாதிக்கப்பட்ட கிழக்கு மக்களுக்கு உதவ வேண்டும் எனவும் இச்சந்தர்ப்பத்தில் அன்பு வேண்டுகோள் விடுக்கிறோம்.

ஏற்கனவே கொட்டாஞ்சேனை ஸ்ரீ வரதராஜ விநாயகர் ஆலயம், வெள்ளவத்தை மயூராபதி ஸ்ரீ பத்திரகாளி அம்பாள் ஆலயம் என்பவற்றின் அறங்காவலர்களும், மனிதநேய அறநிதியம், உலகச் சைவப் பேரவை போன்ற சமூக நிறுவனங்களும் உதவியிருக்கிறார்கள்.

இங்கிருந்து அனுப்பப்படும் நிவாரணங்களை கிழக்கிலுள்ள பாதிக்கப்பட்ட மக்களுக்கு வழங்குவதில் மாமன்றத்தின் அங்கத்துவ சங்கங்களான மட்டக்களப்பு இந்து இளைஞர் மன்றம், ஆலையடிவேம்பு பிரதேச இந்து மாமன்றம், மட்டக்களப்பு மாவட்ட இந்து இளைஞர் பேரவை மற்றும் கிழக்குப் பல்கலைக்கழக இந்து மாணவர் மன்றம் என்பன முன்னெடுத்துச் செல்கின்றன என்பதையும் தெரிவித்துக் கொள்கிறோம்.

எங்கள் சகோர சகோரிகளின் துயரங்கள் முற்றாகவே நீங்கி, எந்தவிதமான அனர்த்தங்களினாலும் பாதிக்கப்படாத வகையில் நிம்மதியாக வாழும் சூழ்நிலை ஏற்படவேண்டும் என்பதற்காக தைப்பொங்கல் நாளில் இறையருள் வேண்டிப் பிரார்த்தனையில் ஈடுபடுமாறு மாமன்றம் இந்து மக்களைக் கேட்டுக் கொள்கிறது.

எங்களது மக்கள் வாழ்வில் என்றென்றும் மகிழ்ச்சி பொங்கும் வகையிலான ஒளிமயமான எதிர்காலம் உதயமாகவேண்டும். என அருள்மிகு சிவகாமி அம்பாள் சமேத நடராஜப் பெருமானைப் பிரார்த்திக்கிறோம்.

வி.கயிலாசபிள்ளை
தலைவர்

கந்தையா நீலகண்டன்
பொதுச் செயலாளர்

அகிலஇலங்கை இந்து மாமன்றம் - கொழும்பு

:”@: