வலுவான லோக்பால் வராவிட்டால் மீண்டும் உண்ணாவிரதம்

அன்னா மிரட்டல்
டெல்லி:
வலுவான லோக்பால் சட்டமூலம் நிறைவேற்றப்படாவிட்டால் மீண்டும் உண்ணாவிரதம் இருக்க போவதாக சமூக ஆர்வலர் அன்னா ஹஸாரே எச்சரிக்கை விடுத்துள்ளார்.

ஊழலுக்கு எதிரான லோக்பால் சட்டமூலத்தை நடந்து கொண்டிருக்கும் நாடாளுமன்ற குளிர்கால கூட்டத் தொடருக்குள் நிறைவேற்றாவிட்டால் மீண்டும் காலவரையற்ற உண்ணாவிரதம் இருப்பேன் என்று அன்னா ஹஸாரே ஏற்கனவே அறிவித்துள்ளார். இந்நிலையில் நாடாளுமன்ற நிலைக்கு சமர்பித்துள்ள லோக்பால் சட்டமூலம் மீது அன்னா குழுவினருக்கு திருப்தி இல்லை.

இதையடுத்து நேற்று முன்தினம் அன்னா டெல்லி ஜந்தர் மந்தரில் ஒரு நாள் அடையாள உண்ணாவிரதம் இருந்தார். அதற்கு பா.ஜ.க தெலுங்கு தேசம், சி.பி.ஐ. ஆகிய கட்சிகள் ஆதரவு தெரிவித்து தங்கள் பிரதிநிதிகளை அனுப்பி வைத்தன.

நேற்று செய்தியாளர்களை சந்தித்து அன்னா கூறியதாவது; இந்தியாவில் இருந்து ஊழலை விரட்ட லோக்பால் சட்ட மூலம் கண்டிப்பாகத்தேவை. வலுவான லோக்பால் சட்டம் கிடைக்கும் வரை போராடுவோம். எங்கள் போராட்டத்திற்கு ஏராளமானோர் ஆதரவு தெரிவித்துள்ளனர். நான் மீண்டும் உண்ணாவிரதம் இருப்பேன் என்றார்.

காங்கிரஸ் வலுவான லோக்பால் மசோதாவை நிறைவேற்றத் தான் நடவடிக்கை எடுத்து வருகிறது. இதற்காகத் தான் பிரதமர் மன்மோகன் சிங் இன்று அனைத்துக் கட்சி கூட்டத்தை கூட்டவுள்ளார் என்று அக்கட்சியின் செய்தித் தொடர்பாளர் திக்.விஜய் சிங் தெரிவித்துள்ளார்.