பெண்கள் மீதான தாக்குதலை கண்டித்து எகிப்தில் ஆர்ப்பாட்டம்

எகிப்தில் பெண் ஆர்ப்பாட்டக்காரர்கள் மீது அந்நாட்டு இராணுவம் நடத்திய கண்மூடித்தனமான தாக்குதலை கண்டித்து ஆயிரக்கணக்கான பெண்கள் தலைநகர் கெய்ரோவில் ஆர்ப்பாட்டத்தில் ஈடுபட்டனர்.

எகிப்தில் ஆளும் இராணுவ கவுன்ஸிலுக்கு எதிராக கடந்த வெள்ளிக்கிழமை தொடக்கம் மீண்டும் மக்கள் போராட்டம் இடம்பெற்றுவருகிறது. இதில் பங்கேற்ற பெண் போராட்டக்காரர்கள் மீது இராணுவம் மற்றும் பொலிஸார் கடுமையாக தாக்குதல் நடத்தினர்.

பெண் ஒருவர் மீது இராணுவ வீரர்கள் குவிந்து கண்மூடித்தனமாக தாக்குதல் நடத்தும் காட்சிகள் பல ஊடகங்களிலும் ஒளிபரப்பப்பட்டன.

இந்நிலையில் 10 ஆயிரத்திற்கும் மேற்பட்ட பெண்கள் நேற்று முன்தினம் இந்த தாக்குதலை கண்டித்து ஆர்ப்பாட்டம் நடத்தினர். இதன்போது ஆர்ப்பாட்டக்காரர்கள் மீது பாதுகாப்புப் படையினர் நடத்தும் தாக்குதல்கள் உடன் நிறுத்த வேண்டும் என இவர்கள் கோஷமெழுப்பினர்.

தஹ்ரிர் சதுக்கத்தில் இராணுவ கவுன்ஸிலுக்கு எதிராக 5ஆவது நாளாகவும் நேற்று முன்தினத்திலும் ஆர்ப்பாட்டங்கள் இடம்பெற்றன. இதன்போது பாதுகாப்புப் படையினருக்கும், ஆர்ப்பாட்டக்காரர்களுக்கும் இடையில் மோதல் ஏற்பட்டது.

கடந்த வெள்ளிக்கிழமை தொடக்கம் நீடித்துவரும் மோதல்களில் 14 பேர் கொல்லப்பட்டதோடு 900 பேரளவில் காயமடைந்தனர்.

இதேவேளை பெண்களுக்கு எதிராக நடந்த தாக்குதலுக்கு இராணுவ கவுன்ஸில் மன்னிப்பு கேட்டுக்கொண்டுள்ளது.