போலீஸ்காரர்கள் ஒன்றுசேர்ந்து மாமூல் கேட்பதாக மணலி போலீசில் விபசார இளம்பெண் புகார்

இளம்பெண்களை வைத்து விபசாரம் நடத்திய கும்பலிடம், மாமூல் கேட்ட விவகாரத்தில் போலீஸ்காரர், ஊர்க்காவல் படை வீரர் உட்பட ஆறுபேரை போலீசார் கைது செய்தனர்.


மணலி, பெரியதோப்பை சேர்ந்தவர் அருண்குமார், 30. இவரது மனைவி ரேவதி, 27. இங்கு 11 நாட்களுக்கு முன் குடிவந்தனர். இதற்கு முன், இவர்கள் மாதவரம் பால்பண்ணை பகுதியில் வாடகைக்கு வீடு எடுத்து இளம்பெண்களை வைத்து விபசாரம் நடத்தினர். இதையறிந்த மாதவரம் பால்பண்ணை போலீஸ்காரர் முருகேஸ்வரன், 28, ஊர்க்காவல் படையை சேர்ந்த மகேஸ்வரன், 24 ஆகியோர் ரேவதியை மிரட்டி மாமூல் வாங்கினர். இந்நிலையில், மாதவரத்தில் வீட்டை காலி செய்துவிட்டு, மணலி பெரியதோப்பிற்கு ரேவதி குடிபெயர்ந்தார். இதையறிந்த போலீஸ்காரர் முருகேஸ்வரன், ஊர்க்காவல்படையை சேர்ந்த மகேஸ்வரன் ஆகியோர் இரண்டு நாட்களுக்கு முன் ரேவதியிடம் மாமூல் கேட்க சென்றனர். வீட்டு உரிமையாளர் கண்டிப்பானவர், அதனால், இங்கு தொழில் செய்வதில்லை என்று ரேவதி கூறி அவர்களை அனுப்பிவிட்டார். ரேவதியின் வீட்டில் விபசாரம் நடப்பதை உறுதி செய்ய, தனது நண்பர்கள் மாதவரத்தை சேர்ந்த பிரேம்குமார், 29;சையது அலி, 27 ஆகியோரை வாடிக்கையாளர் போல ரேவதி வீட்டிற்கு போலீஸ்காரர் முருகேஸ்வரன், மகேஸ்வரன் ஆகியோர் அனுப்பினர். அங்கு சகிலா பானு என்ற பெண்ணை காண்பித்து, ரேட் 2,500 ரூபாய் என அவர்களிடம் ரேவதி பேரம் பேசிக் கொண்டிருந்தார். அப்போது, மறைவாக நின்றிருந்த போலீஸ்காரர் முருகேஸ்வரன், ஊர்காவல்படையை சேர்ந்த மகேஸ்வரன் ஒன்றும் தெரியாததுபோல் ரேவதியிடம் வந்தனர்.



இங்கும் தொழில் செய்வதால், ரேவதியிடம் மாமூல் தரும்படி இருவரும் கேட்டனர். தன்னிடம் தற்போது பணம் இல்லை;மணலியில் வசிக்கும் சித்தியிடம் பணம் வாங்கித் தருவதாகக் ரேவதி கூறினார். ஊர்காவல்படை வீரர் மகேஸ்வரன் ஓட்டிய பைக்கில் பின்பக்கமாக ரேவதி அமர்ந்து கொண்டார். சிறிது தூரம் சென்றதும், அங்கிருந்து தப்பி, காக்கி பேன்ட் போட்ட போலீஸ்காரர்கள் ஒன்றுசேர்ந்து மாமூல் கேட்பதாக மணலி போலீசில் ரேவதி புகார் அளித்தார். வடக்கு மண்டல இணைகமிஷனர் செந்தாமரை கண்ணன் உத்தரவின்படி, மணலி புதுநகர் இன்ஸ்பெக்டர் திருமலை(பொறுப்பு), எஸ்.ஐ., சவுந்தர்ராஜன் மற்றும்போலீசார், கும்பலை சுற்றிவளைத்தனர். விபசாரத்தில் ஈடுபடுத்திய சகிலாபானுவை போலீசார் மீட்டு, மயிலாப்பூர் மகளிர் காப்பகத்தில் தங்க வைத்தனர். இது தொடர்பாக, போலீஸ்காரர் முருகேஸ்வரன், ஊர்க்காவல் படை வீரர் மகேஸ்வரன், அவரது நண்பர்கள் பிரேம்புகார், சையது அலி, பிரேம்குமார், அவரது மனைவி ரேவதி ஆகியோரை போலீசார் கைது செய்து,சிறையில் அடைத்தனர்.

விபசார கும்பலிடம் மாமூல் கேட்டதால் அம்பலம்! மாதவரம், செங்குன்றம் உள்ளிட்ட பல இடங்களில் வீட்டை வாடகைக்கு எடுத்து,விபசாரம் நடத்திய ரேவதி மற்றும் அவரது கணவன் பிரேம்குமார், கடைசியாக மணலிக்கு குடிவந்தனர். புதிதாக குடிவந்த ரேவதியின் வீட்டிற்கு, நிறைய ஆண்கள் வருவதை அறிந்த வீட்டு உரிமையாளர், வீட்டை காலி செய்யும்படி தகராறு செய்தார். இதனால், அந்த வீட்டை ஒருசில நாட்களில் மாற்றுவதற்கு ரேவதி திட்டமிட்டிருந்தார். அதற்குள், போலீஸ்காரர்கள் மாமூல் கேட்ட விவகாரத்தினால், தற்போது வீடு பூட்டப்பட்டு போலீஸ் விசாரணைக்கு உரிமையாளர் உட்படுத்தப்பட்டுள்ளார்.