நோயாளிகள் கர்ப்பம் தரிக்கலாமா?

கருத்தரிக்கும் பெண்ணின் உடல் நிலை சாதாரணமாக இருக்கும்பட்சத்தில், கருவுறுதலுக்கு முன்பு, பிரத்யேகப் பராமரிப்பு எதுவும் தேவையில்லை. ஆனால், சர்க்கரை நோய், வலிப்பு, இதயநோய், ஆஸ்துமா போன்ற பிரச்னைகள் உள்ளவர்கள் குழந்தை பெற்றுக்கொள்ள திட்டமிடும் முன்பே, முழு உடல் பரிசோதனை செய்து, மருந்துகள் எடுத்துகொண்டு, உடலை கருத்தரிக்க ஏற்றநிலையில் வைத்துகொண்டபிறகு, கருவுறுதல் நல்லது. இதனால் கர்ப்பகாலம்-பேறுகாலத்தில் ஏற்படும் சிக்கல்களை தவிர்க்கலாம்.

உயர் ரத்த அழுத்தம்....... கர்ப்பிணிக்கு ஏற்கெனவே உயர்ரத்த அழுத்தம் இருந்தால், அதன் பாதிப்பு ஏழாவது மாதத்தில் இருந்து தெரிய தொடங்கும். இதன் முக்கிய அறிகுறி-கால் வீக்கம். அடிக்கடி தலைசுற்றி படபடப்பு வரும். இவருக்கு அடிக்கடி ரத்தம்-சிறுநீர் பரிசோதனை செய்து பார்ப்பது நல்லது. அதிக பிரச்னை இருந்தால் உடனடியாக டாக்டரை பார்ப்பது அவசியம்.

இதய நோய்......... சிறுவயதுமுதலே இதயநோய்க்காக மருந்து-மாத்திரைகள் சாப்பிடுபவர்கள், கருத்தரிப்புக்கு முன்போ-கர்ப்பம் உறுதியான பிறகோ, டாக்டரிடம் `நான் ஒரு இதய நோயாளி; இன்னென்ன மருந்துகளை சாப்பிடுகிறேன்' என்று தெளிவாக சொல்லிவிட வேண்டும்.

அப்போதுதான் கூடுதல் கவனத்தோடு அந்தத் தாயையும், அவள் வயிற்றில் வளரும் சிசுவையும், எந்த ஆபத்தும் இன்றி டாக்டரால் காப்பாற்ற முடியும். இப்போது எல்லாம் இதய நோயாளிகள் மட்டுமின்றி கர்ப்பிணிகள் அனைவருமே `ஈ.ஸி.ஜி', `கார்டியாக்-எக்கோ' போன்ற இதயம் தொடர்பான பரிசோதனைகளுக்கு உட்படுத்தப்படுகிறார்கள்.

ஆஸ்துமா......... இத்தகைய நோயாளிகளும் கர்ப்பகாலத்தில் சிறப்பாக கவனிக்கப்பட வேண்டியவர்களே.திருவிழா போன்ற நெரிசல் மிகுந்த இடங்களிலும், தூசி நிறைந்த இடங்களிலும் நடமாடுவதை தவிர்க்க வேண்டும். அதையும்மீறி ஏதேனும் பாதித்து மூச்சு விடுவதில் சிரமம் வந்தால், டாக்டரின் ஆலோசனையுடன் மருந்துகளை உட்கொள்ள வேண்டும்.

அடுத்ததாக டி.பி. என்கிற காசநோய். இதை வந்த வேகத்திலேயே விரட்டும் அளவுக்கு, மருத்துவம் இப்போது முன்னேறிவிட்டது. ஆனாலும் டி.பி. நோயாளிகள் மருந்து சாப்பிடும் நேரங்களில், கருத்தரிக்காமல் இருப்பது நல்லது. ஏனெனில் காசநோய் மருந்துகளின் வீரியம், கர்ப்பத்தில் இருக்கும் குழந்தையையும் பாதிக்கும்!