தந்தைக்கு கிட்னியை தானம் செய்த பெண்: ரோபோட்டிக் முறையில் ஆபரேசன்

by *சம்ஸ் Sat 20 Jul 2013 - 11:27

சென்னை, ஜூலை. 20–
திருப்பதியை சேர்ந்தவர் கருணாகரன். வியாபாரம் செய்து வருகிறார். சிறுநீரகம் பாதிக்கப்பட்டதால் கடந்த 2 ஆண்டுகளாக மிகவும் அவதிப்பட்டார். வாரம்தோறும் டயாலிசிஸ் சிகிச்சை அளிக்கப்பட்டது.
இந்த நிலையில் சென்னை அப்பல்லோ மருத்துவமனையில் அனுமதிக்கப்பட்டார். அவரது உடல் நிலையை பரிசோதித்த டாக்டர்கள் இரு சிறுநீரகங்களும் செயல் இழந்துவிட்டது. எனவே புதிதாக கிட்னி பொருத்தினால்தான் கருணாகரன் உயிர் பிழைப்பார் என்று டாக்டர்கள் கூறிவிட்டனர்.
கிட்னி தானத்துக்காக காத்திருந்தனர். கருணாகரனின் 3 மகள்களில் இளைய மகளான சுஜித்ரா (24)-வின் கிட்னி கருணாகரனுக்கு பொருத்தமாக இருந்தது.
ஆனால் சுஜித்ரா கிட்னி தானம் செய்வதால் ஏற்படும் பின் விளைவுகள் மற்றும் வயிற்றில் பெரிய அறுவை சிகிச்சை செய்வதால் பெரிய தழும்பு ஏற்படும். சிகிச்சை முடிந்து வீடு திரும்பவும் பல நாட்கள் ஆகும் என்று யோசித்தார்.
அவரிடம் ரோபோடிக் முறையில் கிட்னி எடுப்பது பற்றி டாக்டர்கள் விளக்கினார்கள். உடனே சுஜித்ரா சம்மதம் தெரிவித்தார்.
இந்த முறையில் கிட்னியை எடுப்பதற்காக சுஜித்ராவின் அடிவயிற்றில் சிறு துவாரம் மட்டும் போடப்பட்டது. அதன் வழியாக ரோபோ உள்ளே அனுப்பப்பட்டது.
டாக்டர்கள் கம்ப்யூட்டர் மூலம் ரோபோவுக்கு கட்டளைகள் பிறப்பித்து கொண்டிருந்தார்கள். சரியாக கிட்னி இருக்கும் இடத்துக்கு ரோபோவை அனுப்பி அறுவை சிகிச்சை செய்து எடுக்க சொன்னதும் ரோபோ கிட்னியை எடுத்து வெளியே கொண்டு வந்தது.
அதன் பிறகு கருணாகரனுக்கு அறுவை சிகிச்சை மூலம் கிட்னி பொருத்தப்பட்டது. சுஜித்ராவின் உடல்நிலை 3 நாட்களில் சகஜ நிலைக்கு திரும்பியது. சிறுநீரகம் சிறப்பாக வேலை செய்வதால் கருணாகரனின் உடல் நிலையும் தேறி வருகிறது. ஒரு வாரத்தில் அவர் பூரணமாக குணம் அடைந்துவிடுவார் என்று டாக்டர் அனந்தகிருஷ்ணன் தெரிவித்தார்.
ரோபோடிக் முறை சிகிச்சையில் அதிகமாக ரத்தம் வெளியேறாது. தழும்பும் சிறிய அளவில் இருக்கும். வழக்கமான சிறுநீரக மாற்று அறுவை சிகிச்சைக்கு ரூ.6 லட்சம் செலவாகும். ஆனால் ரோபோடிக் சிகிச்சைக்கு கூடுதலாக ரூ.1 லட்சம் செலவழியும் என்றும் டாக்டர்கள் கூறினார்கள்.