டில்லியில் ஆன்லைன் மூலம் வாகனங்களுக்கான விஐபி எண் ஏலம்

புதுடில்லி : தனியாருக்கு சொந்தமான வாகனங்களுக்கு வி.ஐ.பி., பதிவு எண்கள் வழங்குவதற்கான ஏலத்தை அடுத்த 2 வாரங்களில் ஆன்லைன் மூலம் நடத்த டில்லி அரசு முடிவு செய்துள்ளது. ஆன்லைன் மூலம் இந்த ஏலத்தை நடத்துவதற்கு டில்லி துணைநிலை ஆளுநர் நஜீப் ஜங் ஒப்புதல் தெரிவித்துள்ளார். இந்த ஏலத்திற்கான முறையான அறிவிப்பை அடுத்த வாரத்திற்குள் வெளியிடவும் டில்லி போக்குவரத்துத் துறையை அவர் அறிவுறுத்தி உள்ளார்.
டில்லி அரசின் வருமானத்தை ரூ.200 கோடிகள் வரை உயர்த்துவதற்காக ஆண்டுதோறும் விஐபி வாகன பதிவு எண் ஏலத்தை ஆன்லைன் மூலம் டில்லி நிர்வாகம் நடத்தி வருகிறது. விஐபி வாகன பதிவு எண்களுக்கான ஏலத்தை ஆன்லைனில் நடத்துவதற்கு முதல் முறையாக 2012ம் ஆண்டு ஜூலை 30ம் தேதி காங்கிரஸ் அமைச்சரவை ஒப்புதல் அளித்தது. மத்திய அமைச்சர்கள், எம்.பி.,க்கள், எம்.எல்.ஏ.,க்கள், ஐகோர்ட் நீதிபதிகள், சட்டபை சபாநாயகர், துணை சபாநாயகர், லோக்சபா மற்றும் ராஜ்யசபா பொதுச் செயலாளர்கள் மற்றும் டில்லி நிர்வாகத்தின் மூத்த அதிகாரிகள் ஆகியோர் இந்த ஏலத்தொகையை தங்களின் சொந்த பணத்தை கொண்டு செலுத்துவதில்லை என தகவல்கள் வெளியாகி உள்ளன.
போக்குவரத்து துறையின் இணையதளம் மூலம் இந்த விஐபி எண் ஏலம் நடத்தப்பட உள்ளது. ஒரு குறிப்பிட்ட விஐபி எண் ஏலம் விடப்பட்டதும், அடுத்த 15 நாட்களுக்குள் அந்த எண் அதிகபட்ச தொகைக்கு ஏலம் கேட்டவருக்கு ஒதுக்கப்படும். ஐந்து வேறுபட்ட பிரிவுகளின் கீழ் இந்த விஐபி வாகன எண்ணிற்கான ஏலம் நடத்தப்பட உள்ளதாக டில்லி போக்குவரத்து நிர்வாகம் தெரிவித்துள்ளது.
'ஏ' பிரிவைச் சேர்ந்த 0001 போன்ற ஒற்றை இலக்க எண்களை ஏலம் எடுப்பதற்கான குறைந்தபட்ச ஏலத்தொகை ரூ.5 லட்சமாகவும், 'பி' பிரிவைச் சேர்ந்த 0002 முதல் 0009 வரையிலான எண்களுக்கு குறைந்த பட்ச ஏலத்தொகை ரூ.3 லட்சமாகவும் நிர்ணயிக்கப்பட்டுள்ளது. 'சி' பிரிவின் கீழ் வரும் 0010 முதல் 0099 மற்றும் 0786 போன்ற எண்களின் குறைந்தபட்ச ஏலத்தொகை ரூ.2 லட்சம் ஆகும். 'டி' பிரிவிற்கு உட்பட்ட 0100, 0111, 0222, 0200 உள்ளிட்ட எண்களுக்கான குறைந்தபட்ச ஏலத்தொகை ரூ.1 லட்சம் ஆகும். தங்கள் விருப்பத்திற்கேற்ப வாகன எண்ணை தேர்வு செய்யும் ஏலத்திற்கு குறைந்தபட்ச ஏலத்தொகையாக ரூ.20,000 நிர்ணயிக்கப்பட்டுள்ளது.
பேன்சி நம்பர்களை தங்கள் வாகனங்களுக்கு வைத்துக் கொள்ள டில்லிவாசிகள் அதிக ஆர்வம் காட்டுவதால், டில்லி நிர்வாகத்திற்கு கூடுதல் வருமானம் கிடைக்கிறது. இந்த ஏலத்தில் யார் வேண்டுமானாலும் கலந்து கொள்ளலாம் என டில்லி போக்குவரத்து துறை நிர்வாகம் தெரிவித்துள்ளது.

நன்றி: தினமலர்