மாலைதீவு முன்னாள் ஜனாதிபதி சிகிச்சைக்காக பிரிட்டனுக்கு பயணித்தார்

by **நண்பன்** Wed 20 Jan 2016 - 8:13

சிறை அனுபவிக்கும் மாலைதீவு முன்னாள் ஜனாதிபதியும் எதிர்க்கட்சி தலைவருமான மொஹமட் நஷீட் மருத்துவ சிகிச்சைக்காக பிரிட்டனுக்கு பயணித்தார்.
மாலைதீவு அரசு கடைசி நேரத்தில் முன்வைத்த நிபந்தனையால் நஷீடின் பயணம் ஒரு தினம் தாமதித்ததாக அவரது கட்சியினர் குற்றம்சாட்டினர்.
தீவிரவாத தடுப்பு சட்டத்தின் கீழ் நஷீடுக்கு கடந்த ஆண்டு 13 வருடங்கள் சிறைத்தண்டனை விதிக்கப்பட்டது. பிரட்டனில் சத்திர சிகிச்சைக்கு பின்னர் நாடு திரும்புவதற்கான நிபந்தனையில் நஷீட் கைச்சாத்திட்டதாக மாலைதீவு அரசு குறிப்பிட்டுள்ளது.
நஷீடுக்காக பிணை இருக்க அவரது சகோதரர் இணங்கியதாக அரசு குறிப்பிட்டுள்ளது. சர்வதேச அழுத்தத்தை அடுத்தே நஷீடை மருத்துவ சிகிச்சைக்கு பிரிட்டனுக்கு அனுப்ப மாலைதீவு அரசு கடந்த சனிக்கிழமை இணக்கம் தெரிவித்திருந்தது.
நஷீட் நாடு திரும்புவதை உறுதி செய்வதற்கு அவரது குடும்ப உறுப்பினர் ஒருவர் தலைநகர் மாலேவில் தங்கி இருக்க அரசு நிபந்தனை விதித்ததாக நஷீடின் வழக்கறிஞர்கள் குறிப்பிட்டிருந்தனர். இது ஒரு மிரட்டல் வேலை என்றும் அவர்கள் குற்றம்சாட்டினர்.
எனினும் எந்தவொரு கைதியும் மருத்துவ சிகிச்சைக்கு வெளிநாடு செல்லும் முன்னர் கடைப்பிடிக்கும் வழமையான செயல்முறை இதுவென மாலைதீவு வெளியுறவு அமைச்சர் துன்யா மவ்மூன் குறிப்பிட்டார்.
இந்நிலையில் நஷீட் தொலைபேசி ஊடாக அமெரிக்க வெளியுறவுச் செயலாளர் ஜோன் கெர்ரியுடன் உரையாற்றியதாக நஷீடின் அமெரிக்க வழக்கறிஞரான ஜரேட் ஜென்சர் டுவிட்டர் ஊடே குறிப்பிட்டுள்ளார்.
நஷீட் திங்கள் பின்னேரம் பிரட்டன் செல்வதற்காக மலேவில் இருந்து கொழும்புக்கு விமானம் மூலம் வந்ததாக ஏ.எப்.பி. செய்திச் சேவை குறிப்பிட்டுள்ளது. கடந்த 2008 ஆம் ஆண்டு மாலைதீவின் முதலாவது ஜனநாயக தலைவராக தேர்வான நஷீட், நான்கு ஆண்டுகளுக்கு பின்னர் பதவி விலகினார். எனினும் தமக்கு எதிராக சதிப்புரட்சி ஒன்று இடம்பெற்றதாக அவர் குற்றம்சாட்டி இருந்தார்.
நீதிபதி ஒருவரை கைது செய்ய உத்தரவிட்ட குற்றச்சாட்டில் நஷீட் 2012 ஆம் ஆண்டு கைது செய்யப்பட்டார்.

தினகரன்