பிரம்மபுரீஸ்வரர் கோயில் மரகத லிங்கம் திருட்டு

by **rammalar** Mon 17 Oct 2016 - 5:21

நாகை மாவட்டம், திருக்குவளை பிரம்மபுரீஸ்வரர்
கோயிலிலிருந்த மரகத லிங்கம் ஞாயிற்றுக்கிழமை
மாலை திருட்டுப்போனது.

இதுதொடர்பான விசாரணைக்கு 3 தனிப்படைகள்
அமைக்கப்பட்டுள்ளன.

திருக்குவளையில் உள்ள பிரம்மபுரீஸ்வரர் திருக்கோயில்,
சப்த விடங்கர் தலங்களுள் ஒன்றாக விளங்குகிறது.
இங்குள்ள தியாகராஜசுவாமி மூர்த்தமும், மரகதத்தால்
ஆன அவனி விடங்கர் லிங்கமும் முசுகுந்த சக்கரவர்த்தியால்
நிர்மாணிக்கப்பட்டது என்கிறது புராணம்.

1,000 ஆண்டுகளுக்கும் முற்பட்ட இந்த மரக லிங்கம்,
காலப் பழைமை, தெய்வீகப் பெருமைகளால்
விலைமதிப்பற்றது என்பதால், தியாகராஜசுவாமி சன்னிதி
கருவறையில் உள்ள பாதுகாப்புப் பெட்டியில், வெள்ளிப்
பெட்டிக்குள் வைத்துப் பாதுகாக்கப்படும்.

தினமும், காலை, மாலை வேளைகளில் வெளியே எடுக்கப்பட்டு
அபிஷேகம் நடத்தப்பட்ட பின்னர், மீண்டும் பெட்டிக்குள் வைத்துப்
பூட்டி பாதுகாக்கப்படும்.

திருக்குவளையைச் சேர்ந்த கணேசன் இந்தக் கோயிலின்
சிவாச்சாரியாராகவும், அதே பகுதியைச் சேர்ந்த ரவிச்சந்திரன்
மெய்க்காப்பாளராகவும் உள்ளனர். ஞாயிற்றுக்கிழமை காலை
அவனி விடங்கர் லிங்கத்துக்கு வழக்கமான பூஜைகள் ந
டத்தப்பட்டு பெட்டிக்குள் வைக்கப்பட்டுள்ளது. வழக்கம் போல,
பகல் 12.30 மணிக்கு கோயில் பூட்டப்பட்டது.

மாலை சுமார் 5 மணிக்கு தியாகராஜசுவாமி சன்னிதிக்கு வந்த
சிவாச்சாரியாரும், மெய்க்காப்பாளரும் சன்னிதியைத் திறந்து
விளக்கேற்றி வைத்துவிட்டுச் சென்றுள்ளனர்.

மாலை 6.15 மணிக்கு மரகத லிங்க பூஜைக்காக இருவரும் மீண்டும்
தியாகராஜசுவாமி சன்னிதிக்கு வந்தபோது, மரகத லிங்கம்
வைக்கப்பட்டிருந்த பாதுகாப்புப் பெட்டியின் பூட்டுகள் உடைக்கப்
பட்டிருந்ததும், பாதுகாப்புப் பெட்டிக்குள், வெள்ளிப் பெட்டியில்
வைக்கப்பட்டிருந்த மரகத லிங்கம் திருட்டுபோனதும் தெரியவந்தது.

இதுகுறித்து கோயில் கண்காணிப்பாளர் செüரிராஜன் திருக்குவளை
போலீஸாருக்குத் தகவல் அளித்தார்.

நாகை மாவட்டக் காவல் கண்காணிப்பாளர் எம். துரை மற்றும்
திருக்குவளை போலீஸார் உடனடியாக நிகழ்விடத்தைப் பார்வையிட்டு
விசாரணை மேற்கொண்டனர். தடய அறிவியல் நிபுணர்கள் விரல்
ரேகைகளைப் பதிவு செய்தனர்.
-
டி.ஐ.ஜி ஆய்வு... தஞ்சை சரக காவல் துறை துணைத் தலைவர்
செந்தில்குமார் திங்கள்கிழமை திருக்குவளை வந்து, நிகழ்விடத்தைப்
பார்வையிட்டு விசாரணை மேற்கொண்டார். பின்னர், திருட்டுபோன
மரகத லிங்கத்தை மீட்க3 தனிப்படைகள் அமைக்க அவர் உத்தரவிட்டார்.
-
-----------------------------------------
தினமணி