நடனப் பள்ளிக்கு போன பிரபுதேவா நயன்தாரா

நடன பிரியர்களுக்கு தெரிந்திருக்கும் சுஜாவை. சற்றே குழம்புகிறவர்களுக்கு ஒரு அறிமுகம். இவர் பிரபல நடன இயக்குனர் ரகுராம் மாஸ்டரின் இளைய மகள்.
சன் டி.வியில் ஒளிபரப்பான கிருஷ்ணதுளசி நெடுந்தொடரின் சீரியலின் நாயகியாகவும் நடித்திருக்கிறார் சுஜா.



முதல் மகளான காயத்ரி ரகுராம் நடனக்கலைஞர் மட்டுமல்ல, நடிகையும் கூட. மக்களை பெற்ற மகராசி என்பது போல மகள்களை பெற்ற மகராசன் இந்த ரகுராம் மாஸ்டர். தமிழகத்தில் மட்டுமல்ல, இன்று உலகம் முழுக்க சென்று நடனக்கலையை பயிற்றுவிக்கும் வேலைகளை செய்து வருகிறார்கள் இந்த செல்ல மகள்கள். அதிலும் சுஜா மனோஜின் பங்கு இன்னும் சிறப்பானது.

2002 ம் ஆண்டு மனோஜ் என்பவரை மணந்து கொண்டு அமெரிக்காவில் செட்டில் ஆகிவிட்ட சுஜா, புகைப்பட கலையையும் விமான பைலட் படிப்பையும் முடித்திருக்கிறார். அதுமட்டுமல்ல, நர்த்தன சாலா என்ற நடன பள்ளியையும் அங்கு துவங்கி வெற்றி கரமாக நடத்தி வருகிறார். இந்த பள்ளியில் சுமார் 300 மாணவ மாணவிகள் படிக்கிறார்களாம். அதில் சிலர் அமெரிக்கர்கள் என்பதும் முக்கியமான விஷயம்.

இந்த பள்ளியின் 5 வது ஆண்டு விழாவில் மாஸ்டர் பிரபுதேவாவும், நயன்தாராவும் சிறப்பு விருந்தினர்களாக கலந்து கொண்டார்களாம். சமீபத்தில் பாலே நடனத்தையும் தனது மாணவர்களுக்கு சொல்லித்தர ஆரம்பித்திருக்கிறார் சுஜா.