முந்தல் கிராமசேவகரின் சடலம் ஓட்டமாவடி, காவத்தைமுனையில் மீட்பு

ஒன்றரை வருடம் காணாமல் போனவர்
முந்தல் கிராமசேவகரின் சடலம் ஓட்டமாவடி, காவத்தைமுனையில் மீட்பு
கல்குடா தினகரன், பாசிக் குடா, புதிய காத்தான்குடி தினகரன் நிருபர்கள்


கடந்த ஒன்றரை வருடங்க ளுக்கு முன்னர் காணாமல் போன புத்தளம் முந்தல் பிர தேசத்தைச் சேர்ந்த கிராம சேவகர் ஒருவரின் சடலம் ஓட்டமாவடி காவத்தை முனை பிரதேசத்தில் நேற்று மீட்டெடுக்கப்பட்டது. காவத்தைமுனை பிர தேசத்திலுள்ள வீடொன்றிலிருந்து புதைக்கப்பட்ட நிலையில் மீட்கப்பட்டுள்ளது.

முந்தல் பிரதேசத் தைச் சேர்ந்த ஓய்வுபெற்ற கிராம உத்தியோகத்த ரும் புத்தளம் சமூக நம்பிக்கை நிதியத்தின் பணி ப்பாளர்களில் ஒருவருமான பட்டானி ராசிக் (55 வயது) என்பவரே சடலமாக மீட்கப்பட்டுள்ளார். 11.02.2010 அன்று பொலன்னறுவைக்கு வந்த மேற்படி ஓய்வுபெற்ற கிராம உத்தியோகத்தர் பொலன்னறுவையில் வைத்து காணாமல் போயுள்ளார்.

இவரை தேடி அவரது உறவினர்களும் பொலிசாரும் விசாரணை செய்து வந்த நிலையில் கடந்த 08.07.2011 அன்று அவரின் நண்பரான நெளசாத் என்பவரை கிளிநொச்சியில் வைத்து கொழும்பு இரகசியப் பொலிசார் கைது செய்ததையடுத்து அவர் வழங்கிய வாக்கு மூலத்தின்படி 16.07.2011 அன்று ஓட்டமாவடி காவத்தைமுனையைச் சேர்ந்த முஸ்தீன் என்பவர் சந்தேகத்தின் பேரில் கைது செய்யப்பட்டுள்ளார்.

இவர் வழங்கிய தகவலையடுத்து நேற்று (28.07.2011) காலை வாழைச்சேனை மாவட்ட நீதவான் நீதிமன்ற நீதிபதி ஏ. எம். றியாழின் உத்தரவின் பேரில் காவத்தைமுனையில் உள்ள வீடொன்றில் ஓய்வுபெற்ற கிராம உத்தியோகத்தரின்சடலம் தோண்டி எடுக்கப்பட்டது.

வாழைச்சேனை மாவட்ட நீதவான் நீதிமன்ற நீதிபதி ஏ. எம். றியாழ், மட்டக்களப்பு போதனா வைத்தியசாலையின் சட்ட வைத்திய ஆலோசகர் டொக்டர் குணதிலக மற்றும் மட்டக்களப்பு பேதனா வைத்தியசாலையின் சட்ட வைத்திய அதிகாரி டொக்டர் எம். ஏ. றகுமான் ஆகியோரது முன்னிலையில் சடலம் தோண்டி எடுக்கப்பட்டது.

ஓய்வுபெற்ற கிராம உத்தியோகத்தர் பட்டானி ராசீக்கின் சடலத்தை அவரது மகன் ராசீக் றிஸ்க்கான் முகம்மட் அடையாளம் காட்டினார்.

சடலத்தை மட்டக்களப்பு வைத்திய சாலைக்கு கொண்டு சென்று பிரேத பரிசோதனை மற்றும் மரபணு பரிசோதனை செய்யுமாறு நீதிபதி றியாழ் உத்தரவிட்டார்.

மரபணு பரிசோதனை செய்த பின்பு எதிர்வரும் செவ்வாய்க்கிழமை (02.08.2011) அன்று சடலத்தை உறவினர்களிடம் கையளிக்குமாறு நீதிபதி இதன் போது உத்தரவிட்டார்.

சந்தேக நபரான முஸ்தீன் பொலிசாரினால் ஸ்தலத்திற்கு அழைத்து வரப்பட்டு அவர் அடையாளம் காட்டிய இடத்தில் பலத்த பொலிஸ் மற்றும் இராணுவ பாதுகாப்புடன் சடலம் தோண்டி எடுக்கப்பட்டது.

மேற்படி சந்தேக நபரான முஸ்தீனின் சின்னம்மாவின் வளவில் கட்டப்பட்டுக் கொண்டிருக்கின்ற வீட்டின் ஒரு பகுதியிலேயே இச்சடலம் புதைக்கப்பட்டிருந்தது.

மேற்படி காணாமற் போன புத்தளம் முந்தல் கிராம உத்தியோகத்தரை தேடி கண்டுபிடித்து தருமாறு புத்தளம் ஜம் இய்யத்துல் உலமா மற்றும் சமூக அமைப்புக்கள் ஆர்ப்பாட்டங்கள் மற்றும் பேரணிகளை நடத்தியிருந்தன.

மேற்படி ஓய்வு பெற்ற கிராம உத்தியோகத்தர் கடத்தப்பட்டு கொலை செய்யப்பட்டிருக்கலாமென பொலிசார் சந்தேகிக்கின்றனர்.

படங்கள்: முர்ஷித், நூர்தீன்

மிகவும் கவலையாக உள்ளது பதிவுக்கு நன்றி