இலங்கை தூதரகம் ஊடாக இராஜதந்திர ரீதியில் நடவடிக்கை

by **நண்பன்** Fri 5 Aug 2011 - 4:06

தலயாத்திரை சென்றோர் மீது சென்னையில் தாக்குதல்
இலங்கை தூதரகம் ஊடாக இராஜதந்திர ரீதியில் நடவடிக்கை
கே. அசோக்குமார்
தமிழகத்தின் சென்னையில் இலங்கையர் அச்சுறுத்தப்பட்டமை தொடர்பாக இலங்கை அரசு இந்தியாவிலுள்ள இலங்கை தூதரகத்தின் ஊடாக இராஜதந்திர மட்டத்தில் நடவடிக்கை எடுத்து வருகிறது என ஊடகத்துறை அமைச்சர் கெஹெலிய ரம்புக்வெல்ல தெரிவித்தார். சென்னையில் இலங்கை யிலிருந்து தலயாத்திரை சென்றவர்கள் தாக்கப்பட்ட சம்பவம் தொடர்பாக செய்தியாளர் ஒருவர் கேட்ட போதே அமைச்சர் மேற்கண்டவாறு தெரிவித்தார்.

தமிழகத்தில் மதவாதப் போக்கும் கொள்கையும் கொண்ட வை. கோ. போன்றவர்களின் ஆவேசமான பேச்சும் செயல் காரணமாக இவ்வாறான விரும்பத்தகாத சம்பவங்கள் நடைபெற்றுள்ளன. எனினும் இனிமேலும் இவ்வாறான சம்பவங்கள் நடைபெறாதவாறு நடவடிக்கை எடுப்பது தொடர்பாக இராஜதந்திர மட்டத்தில் நடவடிக்கை எடுத்துவருகிறோம் என்றார்.

நேற்று முன்தினம் பகல் சுமார் 1.30 மணியளவில் சென்னை புரசைவாக்கம் பகுதியில் தங்கியிருந்த சுமார் 84 இலங்கையர் தங்கியிருந்த இடத்துக்கு 20 பேர் கொண்ட குழுவொன்று முச்சக்கர வண்டிகளிலும், மோட்டார் சைக்கிள்களிலும் வந்து அச்சுறுத்தியுள்ளனனர்.

“தம்பதிவ வந்தனாவ” என சிங்களத்தில் எழுதப்பட்ட ரிஷேர்ட் அணிந்திருந்தனர். அவற்றை கழற்ற வைத்து தீயிட்டு கொளுத்தியதுடன், உடனடியாக இங்கிருந்து வெளியேற வேண்டும் என்றும் அச்சுறுத்தியுள்ளார். சம்பவம் இடம்பெற்ற சில நிமிடங்களிலேயே இலங்கையின் துணைத் தூதர் வீ. கிருஷ்ணமூர்த்தியும் தூதரக அதிகாரிகளும் ஸ்தலத்துக்கு சென்று 84 பேரையும் சென்னை எழும்பூரிலுள்ள மகாபோதிக்கு அழைத்து வந்து பாதுகாப்பாக தங்க வைத்தனர்.

தொடர்ந்து சென்னை பொலிஸ் கமிஷனரிடம் முறைப்பாடு செய்யப்பட்டது. தலயாத்திரை சென்ற 84 இலங்கையரும் தூதரக அதிகாரிகள், பொலிஸாரின் பாதுகாப்புடன் நேற்று மாலை சென்னை மீனம்பாக்கம் விமான நிலையம் அழைத்துவரப்பட்டனர். 6.00 மணிக்கு சென்னையிலிருந்து கொழும்பு நோக்கி 84 பேரும் புறப்பட்டனர். நேற்று இரவு 7.30 மணியளவில் கட்டுநாயக்க விமான நிலையம் வந்தடைந்தனர்.