ரமழானின் வருகைக்காக அலங்கரிக்கப்படும் சுவர்க்கம்

by **நண்பன்** Fri 5 Aug 2011 - 7:52

ரமழானின் வருகைக்காக அலங்கரிக்கப்படும் சுவர்க்கம்
ஹஸ்ரத் இப்னு அப்பாஸ் ரலியல்லாஹு அன்ஹு அவர்கள் அறிவிக்கிறார்கள், ‘கண்மனி முஹம்மது முஸ்தபா ஸல்லல்லாஹு அலைஹிவஸல்லம் பின்வருமாறு திருவுளமானார்கள், புனித ரமழானில் சுவர்க்கலோகத்துக்கு சுகந்த மணமுள்ள புகை கொடுக்கப்படும். வருடம் ஆரம்பத்திலிருந்து கடைசி வருடம் வரை ரமழானின் வருகைக்காக சுவர்க்கம் அலங்கரிக்கப்படுகிறது. ரமழான் மாதம் முதலிரவு வந்ததும் அர்சுக்குக் கீழால் ஒரு காற்று வீசுகிறது.

அதற்கு ‘மீதரா’ என்று பெயர் சொல்லப்படுகிறது. சுவர்க்க மரங்களின் இலைகள் கதவுகளின் வளையங்கள் போல் முழங்க ஆரம்பித்து விடுகின்றன. அதிலிருந்து இனிமையான கானம் ஒன்று கிளம்புகிறது.

பிறகு அழகிய கண்களுடைய ஹுர் எனும் சுவர்க்கக் கன்னிகளான பெண்கள் தமது இல்லங்களிலிருந்து வெளியேறி சுவர்க்கத்தின் மேல் மாடிகளில் நின்று கொண்டு அல்லாஹுத்தஆலாவிடம் கேட்பார்கள், எங்களைப் பெண் பேசுவோர் உண்டா? அவருடன் எங்களை இணைத்து வையுங்கள். என்று சத்தமிடுவார்கள்.

அதற்குப் பிறகு அந்த ஹுர்லீன் பெண்கள் சுவர்க்க மலக்கான ரிழ்வான் அலைஹிஸ்ஸலாம் அவர்களை நோக்கி ‘இது என்ன இரவு?’ என்று கேட்பார்கள். அதற்கு ரிழ்வான் அலைஹிவஸ்ஸலாம் ‘லெப்பைக்’ எனக் கூறிவிட்டு இது ரமழான் மாதத்தின் முதலிரவு முஹம்மது ஸல்லல்லாஹு அலைஹிவஸல்லம் அவர்களின் உம்மத்திலுள்ள நோன்பாளிகளுக்காக சுவர்க்க கதவுகள் திறந்து வைக்கப்படுகின்றன என பதிலுரைப்பார்கள்.

மேலும் பெருமானார் (ஸல்) அவர்கள் கூறினார்கள், அல்லாஹுவுத்தஆலா புனித ரமழானில் நரகத்துக்கு உரியவர்களாகிவிட்ட 10 இலட்சம் பேர்களை ஒவ்வொரு நாளும் நோன்பு திறக்கும் நேரத்தில் நரகத்திலிருந்து விடுதலை செய்கிறான். ரமழான் மாதத்தின் கடைசி நாள் வந்ததும் இருபத்தி ஒன்பது நாட்களாக எத்தனை பேர்களை நகரத்திலிருந்து விடுதலை செய்யப்பட்டதோ அந்த அளவு ஜனங்களை அந்த ஒரே நாளில் அல்லாஹுத்தஆலா நரகத்திலிருந்து விடுதலையளிக்கிறான். என்று திருவாய் மலர்ந்தார்கள் நபி பெருமானார் (ஸல்) அவர்கள்.

யா அல்லாஹ் ரமழானிலே நீ தருவதாக வாக்களித்திருக்கும் சகல விதமான பாக்கியங்களையும் தந்தருள்வாயாக. மேலும் நல்லோர்களின் கூட்டத்தில் ரமழான் மாதத்தில் எங்கள் அனைவரையும் சேர்ந்து அருள்புரிவாயாக ஆமீன். யாரப்பல் ஆலமீன்.

ராபிஹ் இப்னு கலீல் ஆலிம்
(அல்முர்ஸி) வெலிகாமம்