ஜெயலலிதா மீதான வழக்கு: ஆகஸ்ட் 12ம் தேதிக்கு ஒத்திவைப்பு

by **நண்பன்** Tue 9 Aug 2011 - 8:56

தமிழக முதல்வர் ஜெயலலிதா மீதான சொத்து குவிப்பு வழக்கை விசாரித்து வரும் பெங்களூர் சிறப்பு நீதிமன்றம், வழக்கை ஆகஸ்ட் மாதம் 12 ஆம் தேதிக்கு ஒத்திவைத்தது.

முன்னதாக ஜெயலலிதா தரப்பில் இரண்டு வேண்டுகோள்கள் முன்வைக்கப்பட்டன. இந்த வழக்கில் தான் நேரில் ஆஜராவதில் இருந்து விலக்கு அளிக்க வேண்டும் எனவும், தன் மீது சுமத்தப்பட்டுள்ள இந்த வழக்கு குறித்து தான் எழுத்து பூர்வமாக தகவல்களை அளிக்கத் தயாராக உள்ளதாகவும் குறிப்பிட்டுள்ளார்.

இவை இரண்டும் நடக்காத பட்சத்தில், வீடியோ கான்பரன்சிங் முறையில் தகவல் தர தான் தயாராக உள்ளதாகவும் அவர் தெரிவித்துள்ளார்.

ஜெயலலிதாவின் தரப்பில் ஆஜரான பி.குமார் வாதாடுகையில் தமிழ்நாடு சட்டசபை தேர்தலுக்கு பின் ஜெயலலிதா முதலமைச்சர் ஆக பதவி ஏற்ற பிறகு, மாநில சட்டசபையில் தற்போதைய பட்ஜெட் திட்ட அமர்வு மற்றும் கலந்துரையாடல்கள் நடைபெறுவதால் அவருக்கு வீடியோ கான்பரன்சிங் முறையில் தகவல் தர அனுமதிக்க வேண்டும் என தெரிவித்தார் .

ஆனால் இதற்கு அரசு தரப்பு வக்கீல் எதிர்ப்பு தெரிவித்தார். இருதரப்பு வாதங்களையும் கேட்ட நீதிபதி மல்லிகார்ஜுனையா வழக்கை ஆகஸ்ட் மாதம் 12 ஆம் தேதிக்கு ஒத்திவைத்தார் .