லண்டனில் மூன்றாவது நாளாகவும் கலவரம்;; பல இடங்களுக்கும் பரவியது

லண்டனில் மூன்றாவது நாளாகவும் கலவரம்;; பல இடங்களுக்கும் பரவியது
334 பேர் கைது; மேலதிகமாக 1,700 பொலிஸார் பணியில்
லண்டனில் தொடரும் கலவரம் மூன்றாவது நாளாக நேற்று முன்தினமும் நீடித்தது. அத்துடன் இந்த கலவரம் மேலும் பல இடங்களுக்கு பரவி உள்ளதாக லண்டன் பொலிஸார் குறிப்பிட்டுள்ளனர்.

இதன்படி லண்டனின் என்பீல்ட், பிரிக்ஸ்டன், டொல்ஸ்டன், இலிங்டன், வொல்தம்ஸ்டவ் பகுதிகளுக்கும் கலவரம் பரவியுள்ளது. இதன்போது ஏராளமான வாகனங்களும் கடைகளும் தீவைத்து எரிக்கப்பட்டுள்ளதோடு, பல கொள்ளைச் சம்பவங்களும் இடம்பெற்றுள்ளன.

இந்நிலையில் லண்டனில் மேலதிகமாக 1,700 பொலிஸார் பாதுகாப்பு பணியில் ஈடுபடுத்தப்பட்டுள்ளனர். கலவரத்துடன் தொடர்புடைய 334 பேர் கைது செய்யப் பட்டுள்ளதாகவும், 69 பேர் மீது குற்றச் சாட்டு பதிவு செய்யப்பட்டுள்ளதாகவும் ஸ்கொட்லான்ட் யார்ட் பொலிஸார் அறிவித்துள்ளனர்.

இந்நிலையில் இக்கலவரத்தை அடுத்து விடுமுறைக்காக இத்தாலி சென்றிருந்த பிரிட்டன் பிரதமர் டேவிட் கெமனே உடனடியாக நேற்று நாடு திரும்பினார். இந்த விவகாரம் குறித்து உள்துறை அமைச்சர் மற்றும் மெட்ரோபொலிடன் பொலிஸ் ஆணையாளருடன் பேச்சுவார் த்தை நடத்தவுள்ளார்.

பொருளாதார ரீதியில் மிகவும் பின் தங்கியவர்கள் வசிக்கும் லண்டனின் வடக்கு பகுதியில் உள்ள டொட்டன்ஹாம் பகுதியில் முதலில் இந்த வன்முறை பரவியது. 16 வயது சிறுமியை பொலிஸார் கண்மூடித்தனமாக தாக்கியதாலும், மார்க் டுக்கான் (29) என்ற வாலிபர் பொலிஸாரால் சுட்டுக்கொல்லப்பட்ட தாலும் இந்த வன்முறை ஏற்பட்டது.

இதனால் ஆத்திரமடைந்த சுமார் 300 பேர் பொலிஸ் நிலையம் முன் திரண்டு நீதி கேட்டு போராட்டம் நடத்தினர். அவர்களை பொலிஸார் பலப்பிரயோகம் செய்து கலைத்தபோது, கலவரம் மேலும் பரவியது.

லண்டன் மாநகர பொலிஸ் அதிகாரி கிறிஸ்டைன் ஜோன்ஸ் இது குறித்து கூறியதாவது, டோட்டன்ஹாம் கலவரம் பிற பகுதிகளுக்கும் பரவ டுவிட்டர், பேஸ்புக் போன்ற சமூக இணையதளங் களே காரணம்.

பிளாக்பெரி உள்ளிட்ட கையடக்க தொலைபேசிகளில் உள்ள முன்னஞ்சல் வசதியைப் பயன்படுத்தி எளிதில் ஒன்றுசேரும் கலவரக்காரர்கள், வணிக வளாகங்கள், பொலிஸ் வாகனங்கள் மற்றும் பொலிஸாரை குறிவைத்து தாக்குகின்றனர். இவற்றை வீடியோ பதிவுகளாக ‘யூ.டியுப்’ போன்ற இணையதளங்களில் வெளியிடுகின்றனர் என்றார்.