திருச்சி மாவட்டம், மணப்பாறை அருகே போலீஸ் வாகனம் மோதி இறந்தவர் குடும்பத்திற்கு ரூ.1 லட்சம்; ஜெயலலிதா

by **நண்பன்** Thu 11 Aug 2011 - 9:22

சென்னை, ஆக.11-

முதல்-அமைச்சர் ஜெயலலிதா நேற்று வெளியிட்ட அறிக்கையில் கூறியிருப்பதாவது:-

திருச்சி மாவட்டம், மணப்பாறை வட்டம், மணப்பாறை-குளித்தலை சாலையில் நேற்று (10-8-11) காலை வேலைக்கு செல்வதற்காக சாலை ஓரத்தில் நின்று கொண்டிருந்தவர்கள் மீது எதிர்பாராத விதமாக காவல்துறை துணைக் கண்காணிப்பாளர் வாகனம் மோதியது.

இதில், மொண்டிப்பட்டி கிராமம், களத்துப்பட்டியைச் சேர்ந்த கருத்தாள் என்பவரின் மகன் சரவணன் படுகாயமடைந்து மருத்துவமனையில் அனுமதிக்கப்பட்டு, சிகிச்சை பலனின்றி உயிரிழந்தார் என்ற செய்தியை அறிந்து மிகவும் துயருற்றேன். இந்த விபத்தில் அகால மரணமடைந்த சரவணனின் குடும்பத்திற்கு எனது ஆழ்ந்த இரங்கலையும், அனுதாபத்தையும் தெரிவித்துக் கொள்கிறேன்.

மேலும், இந்த சம்பவத்தில் மொண்டிப்பட்டி கிராமம், களத்துப்பட்டியைச் சேர்ந்த வீரபத்திரன் மகன் ஜெயக்குமார், ரெங்கசாமி மகன் சதீஷ் மற்றும் வாகனத்தில் பயணம் செய்த மணப்பாறை காவல்துறை துணைக் கண்காணிப்பாளர், வாகன ஓட்டுனர் ஆகியோர் காயமடைந்தனர் என்பதை அறிந்து மிகவும் வருத்தமடைந்தேன். மருத்துவமனையில் அனுமதிக்கப்பட்டு சிகிச்சை பெற்று வரும் இவர்கள் அனைவருக்கும் நல்லமுறையில் சிகிச்சை அளிக்க மருத்துவமனை அதிகாரிகளுக்கும்,

திருச்சி மாவட்ட நிர்வாகத்திற்கும் உத்தரவிட்டுள்ளேன். இந்த சம்பவத்தில் காயமடைந்துள்ள அனைவரும் விரைவில் பூரண குணமடைய வேண்டும் என்று என்னுடைய விருப்பத்தையும் தெரிவித்துக் கொள்கிறேன். இந்த துயர சம்பவத்தில் உயிரிழந்த சரவணனின் குடும்பத்திற்கு ஒரு லட்சம் ரூபாயும், பலத்த காயமடைந்த ஜெயக்குமார், சதீஷ் ஆகிய இருவருக்கும் தலா ரூ.15 ஆயிரமும் முதல்-அமைச்சரின் பொது நிவாரண நிதியில் இருந்து வழங்க உத்தரவிட்டுள்ளேன்.

இவ்வாறு அறிக்கையில் கூறப்பட்டுள்ளது

மாலை மலர்