எருமைகளுக்கு துரோகம்: நீதிதேவனால் தண்டிப்பு

எருமைகளுக்கு துரோகம்: நீதிதேவனால் தண்டிப்பு
எருமைகள் யானைகளைப் போன்று எங்கள் நாட்டின் அழிவை எதிர்நோக்கி வரும் ஒரு விலைமதிப்பற்ற சொத்தாகும். பொதுவாக எருமை இறைச்சியை மக்கள் சாப்பாட்டுக்கு எடுப்பதில்லை. ஆயினும், எருமைப்பால் மாத்திரமே அவற்றிடமிருந்து பெறப்படுகிறது. எருமைப்பாலிலிருந்து தயாரிக்கப்படும் தயிர் மிகவும் குளிர்ச்சியா னதாகவும், உடல் ஆரோக்கியத்திற்கு அவசியமான உணவாகவும் கருதப்படுகிறது.

எருமைகளை எங்கள் நாட்டின் விவசாயிகளின் நெருங்கிய தோழர்கள் என்று கூட நாம் கருத முடியும். அந்த அளவுக்கு எருமைகள் விவசாயிகளின் வாழ்க்கையில் மிகவும் நெருக்கமாக இருந்து வருகின்றது. இன்று உழவு இயந்திரங்கள் வயல் நிலங்களில் அறிமுகம் செய்யப்பட்டாலும், பெரும்பாலான விவசாயிகள் எருமைகளையே பயன்படுத்தி தங்கள் பொன் விளையும் பூமியை உழவிரும்புகிறார்கள்.

அதனால், எருமைகளை கிராமிய மக்கள் அன்புடன் பராமரிக்கிறார்கள். எருமைகள் பெரிய தோற்றத்துடன் இருந்தாலும், அவை அப்பாவியான மிருகங்களாகும். பெரும்பாலும் பொது மக்களுக்கு அவை முட்டி மோதுவதோ அல்லது வேறு எவ்விதமான தீங்கையோ இழைப்பதில்லை.

அத்தகைய 28 அப்பாவி எருமைகளை ஈவிரக்கமற்ற சில சமூகவிரோதிகள் சட்டவிரோதமாக ஜா-எலக்கு கடத்தி வந்து, அங்குள்ள ரகசியமாக இயங்கும் கசாப்புக் கடைக்கு இறைச்சிக்காக வெட்டுவதற்கு விற்பனை செய்த போது, மூவரை பொலிசார் கைது செய்துள்ளனர். இவர்கள் தனமல்வில என்னும் இடத்திலிருந்து இந்த எருமைகளை லொறிகளில் மறைந்து கொண்டுவந்து விற்க முயற்சித்துள்ளார்கள். இந்த குற்றவாளிகள் இதற்கு முன்னரும் பல தடவைகள் நூற்றுக் கணக்கான எருமைகளை கடத்தி வந்து இறைச்சிக்காக விற்றிருக்கலாம் என்று பொலிஸார் சந்தேகிக்கிறார்கள். வத்தளை நீதவான் நீதிமன்றத்தில் ஆஜர் செய்யப்படவுள்ள இவர்களுக்கு கடுமையான தண்டனை கிடைக்கும் என்று பொலிசார் எதிர்பார்க்கின்றார்கள்.