முபாரக் விசாரணையில் குழப்பம்;; இராணுவ தளபதியை ஆஜராக கோரிக்கை

by **நண்பன்** Wed 17 Aug 2011 - 4:21

முபாரக் விசாரணையில் குழப்பம்;; இராணுவ தளபதியை ஆஜராக கோரிக்கை
வழக்கு செப்டெம்பர் 5ஆம் திகதிக்கு ஒத்திவைப்பு
எகிப்து முன்னாள் ஜனாதிபதி ஹொஸ்னி முபாரக் மீதான விசாரணை நேற்று முன்தினம் இரண்டாவது முறையாக நடந்தது. இவ்விசாரணையில் வழக்கறிஞர்கள் பலர் ஒரே நேரத்தில் வாதிட்டதால், குழப்பம் ஏற்பட்டது. அடுத்த மாதம் 5ம் திகதிக்கு விசாரணை ஒத்திவைக்கப்பட்டுள்ளது.

எகிப்து தலைநகர் கெய்ரோவில் உள்ள பொலிஸ் அகடமி வளாகத்தில் அமைக்கப்பட்டுள்ள தற்காலிக நீதிமன்றத்தில் இம்மாதம் 3ம் திகதி முதன் முறையாக முபாரக் ஆஜர்படுத்தப்பட்டார். அதில், ‘புரட்சிக் காலத்தில் பொலிஸாரை ஏவி மக்களைக் கொன்றார்’ என்ற தன் மீதான குற்றச்சாட்டை அவர் மறுத்தார். இதையடுத்து, நேற்று முன்தினம் இரண்டாவது முறையாக விசாரணை நடந்தது.

ஸ்ட்ரெச்சரில் படுத்த நிலையில், முபாரக் நீதிமன்றத்திற்குக் கொண்டு வரப்பட்டார். அவருடன், அவரது மகன்கள் அலா, கமால், நிதி மோசடியில் 12 ஆண்டு சிறை தண்டனை பெற்றுள்ள முன்னாள் உள்துறை அமைச்சர் ஹபீப் அல் அட்லி ஆகியோரும் வந்தனர்.

விசாரணையில், கொல்லப்பட்டோர் சார்பில் ஏராளமான வழக்கறிஞர்கள் வாதாடியதால், நீதிமன்றத்தில் குழப்பம் நிலவியது. மக்கள் மீது பொலிஸாரை ஏவ, முபாரக் பிறப்பித்த உத்தரவை தெரியப்படுத்த வேண்டும் என அவர்கள் கோரினர். இதில், தற்போதைய இராணுவ ஆட்சியின் தலைவரான முகமது உசேன் தன்தாவி நேரில் ஆஜராகி விளக்கம் அளிக்க வேண்டும் என அரசு தரப்பு வழக்கறிஞர்கள் தெரிவித்தனர்.

முபாரக் ஆட்சியில், அவர்தான் இராணுவ தளபதியாக இருந்தார் என்பதால், முபாரக்கின் உத்தரவு பற்றி தன்தாவிதான் தெளிவுபடுத்த முடியும் என்பது, அரசுத் தரப்பின் வாதம். இருதரப்பு வாதத்தையும் கேட்ட நீதிபதி அகமது ரபாத், அடுத்த மாதம் 5ம் திகதிக்கு விசாரணையை ஒத்திவைத்தார்.

இதன்போது ஹொஸ்னி முபாரக் மீதான விசாரணை தொடர்ந்து தொலைக்காட்சியில் நேரடி ஒளிபரப்பு செய்யப்பட மாட்டாது என நீதிபதி அறிவித்தார். ஹொஸ்னி முபாரக் மீதான நேற்று முன்தின விசாரணையும் அந்நாட்டு தொலைக் காட்சியில் நேரடியாக ஒளிபரப்புச் செய்யப்பட்டமை குறிப்பிடத்தக்கது.

இந்நிலையில் எதிர்வரும் விசாரணைகள் நேரடியாக ஒளிபரப்பப்படாமை விசாரணைக்கு உதவியாக இருக்கும் என எதிர்பார்க்கப்படுகிறது. இதேவேளை, ஹொஸ்னி முபாரக் விசாரணை இடம்பெற்ற போது நிதிமன்ற வாசலில் கூடிய முபாரக் ஆதரவாளர்களுக்கும், எதர்ப்பாளர்களுக்கும் இடையில் கைகலப்பு ஏற்பட்டது. இதன்போது 20 பேர் அளவில் காயமடைந்தனர்.